آتش جواں تھا کبھی تو۔ اردو شاعری ۔ باردگر

ہر اک لب پہ جو داستاں تھا کبھی تو

سنا ہے یہ آتش جواں تھا کبھی تو

اچانک زمانے پہ ظاہر ہوا ہے 

جو اک شخص مجھ میں نہاں تھا کبھی تو

نہیں آج تم کو رہا یاد لیکن  

تمہارا ہی یہ بھی بیاں تھا کبھی تو

نہیں آج پہچان میں آ رہا پر

رہا محفلوں کی یہ جاں تھا کبھی تو 

جسے آج خود ہے طلب سائباں کی

جہاں بھر کی جائےاماں تھا کبھی تو

جو ممتاز بند آنکھ سے بھی دکھے نہ

کھلی آنکھ میں  آسماں تھا کبھی تو 

                 ۔۔۔۔۔۔۔

یہ خوشی سے پیا نہیں جاتا۔ اردو شاعری۔ باردگر

زہر جبرا پلایا جاتا ہے

یہ خوشی سے پیا نہیں جاتا

ساتھ تیرے نہ رہ سکے لیکن

بن تیرے بھی جیا نہیں جاتا

ہو ہی جاتا ہے پیار کیا کیجیئے 

یہ سمجھ کر کیا نہیں جاتا

قہر ڈھایا ہے ایسے رشتے نے 

نام بھی تو لیا نہیں جاتا

ان کہی داستاں سنا تو سنوں

 جو سنا تھا سنا نہیں جاتا

مسکراہٹ پہ حق ہے میرا بھی 

 بن کے انسو بہا نہیں جاتا

تم ہو ممتاز تو کوئی الزام

دوسرے سر دیا نہیں جاتا

۔۔۔۔۔۔

درد یہ اب سہا نہیں جاتا۔ اردو شاعری۔ باردیگر

زخم کیوں کر سیا نہیں جاتا 

درد یہ اب سہا نہیں جاتا

ساتھ رہنا بھی تیرے مشکل ہے

 بن تیرے بھی رہا نہیں جاتا 

خود سمجھ لے تیری عنایت ہے

ہے جو کہنا کہا نہیں جاتا

ہر طرف سے ہوں میں خسارے میں

تو کہے،  کچھ میرا نہیں جاتا 

اب تو لازم طلب ہے سائے کی

دھوپ میں اور جلا نہیں جاتا

تو ہے اس سے بھی باخبر مولا 

جو دعا میں کہا نہیں جاتا

کتنی ممتاز ہے مسیحائی 

ورنہ ہم سے چلا نہیں جاتا

  ۔۔۔۔۔۔

اس شہر میں واقف ۔۔ اردو شاعری ۔ باردگر

اس شہر میں واقف تو بیشمار ملیں گے

کہتے ہیں جنہیں دوست نہ سرکار ملیں گے

چھوڑ آؤ زبان اپنی ذہن اپنا دو گروی

تب جا کے یہاں نام کے یہ یار ملیں گے 

تحفے میں انہیں جان تو نذرانہ میں کر دوں 

پر سوچ میری اور نہ اظہار ملیں گے 

بے غرضی و ہمدری و چاہت کا خزانہ

اخلاص اگر چاہیئے سو  بار ملیں گے

قصہ ہے میری زیست کا عنوان سے عاری

ہر طرز کے زخمی یہاں کردار ملیں گے

کہنے کو نہیں کچھ تو نہ سننے کو بچا کچھ 

ایسے جو ملے تم سے تو بیکار ملیں گے

من چاہے سوالات نہ ہونے کے نتائج 

ٹوٹے ہوئے وہ دل یہاں مسمار ملیں گے

امید یہ ممتاز سے پستی میں اتر جا 

اللہ نہ کرے ایسے نہ لاچار ملیں گے

بتلائیے گا ۔ اردو شاعری ۔ باردگر

ہمیں جو ہمیشہ سے بتلائیے گا

 کبھی اپنے دل کو بھی سمجھائیے گا

جو کہنے کو آئے ہیں کہہ نہ سکیں  گر 

سمجھ جائیے گا سمجھ جائیے گا 

اداسی اگر حد سے بڑھنے تو

بس اک فون مجھ بھی کھڑکائیے گا

غریبوں کی مہمان نوازی جو چاہیں 

چلے آئیے گا چلے آئیے گا 

جو اپنے تصور کی دنیا میں خوش ہے

خدارا انہیں جا نہ بہکائیے گا

کبھی اپنے غم سے ملے گی جو فرصت

تو اوروں کے دکھ درد اپنائیے گا

جو اک بار چپکے اترتی نہیں ہے

فقیری نہ چہرے پہ چپکائیئے گا 

نہ لینا نہ دینا کسی سے اگر ہو

گلی چھوڑ دیجئے نہ ٹکرائیے گا 

مکیں گھر کے بیچین ہوں جسکے دم سے 

کبھی ایسا مہماں نہ ٹہرائیے گا 

اگر سوچ ممتاز بننے کی ہو تو 

بلا کر  ہمیں حکم فرمائیے گا 

             ۔۔۔۔۔۔۔

نام لیا ہے میں نے ۔ اردو شاعری ۔ باردگر

 

زندگی جب بھی تیرا نام لیا ہے میں نے 

 کتنی خاموشی سے دل تھام  لیا ہے میں نے

حد سے زیادہ تجھے کرتے جو تواضع دیکھا

اپنی اشکوں سے بھرا جام لیا ہے میں نے

جس بلندی میں گراوٹ ہو نہیں ہے منظور

فیصلہ آج  سر بام لیا ہے میں نے 

اس کا چرچا یہاں محفل میں ہوا ہے کیونکر

وہ جو تنہائی میں پیغام لیا ہے میں نے

تجھکو احساس گناہ ہو گا کسی دن اسکا

بیوفائی کا جو الزام لیا ہے میں نے 

تم تو الفاظ سے ممتاز ہوئے ہو لیکن

اپنی آنکھوں سے یہی کام لیا ہے میں نے 

         ۔۔۔۔۔۔۔۔۔

وارے۔ اردو شاعری ۔ باردگر

ہر اک رنجش سبھی شکوے تیری مسکان پہ وارے

مجھے تو دوست کہتا ہے اسی پہچان پہ وارے 

تو کیا سمجھا تمہاری بے اعتنائی مار ڈالے گی

تو جس پر دھیان دیتا ہے تمہارے دھیان پہ وارے

محبت سب کو اپنی جان سے ہونا تو فطری ہے

سلام اس پر جو اپنی جاں  کسی کی جان پہ وارے 

وہ تھا  کردار میں بےمثل اور گفتار میں اعلی 

سبھی مہمان جاتے تھے میرے مہمان پہ وارے 

سدھر جائیگا اکدن لوٹ آئے گا میری جانب

سبھی پل زندگی کے تھے اسی امکان پہ وارے 

اگر گننے کی نوبت آ گئی تو ہار جاؤ گے

کہ سارے فائدے ہم نے تیرے نقصان پہ وارے 

نہیں تھا جوش کافی زیست کے ممتاز ہونے کو 

زمانہ ہو گیا خود کو اسی  ہیجان پہ وارے

۔۔۔۔۔۔۔۔۔