ڈوری سے بندھا ہے ۔ اردو شاعری ۔ مدت ہوئی عورت ہوئے ۔ اضافی کلام ۔ اشاعت 2025ء

بندھا ہے

یہ دوستی ، رشتے وفا خلوص کی گردان 

ہر ایک مفادات کی ڈوری سے بندھا ہے 

پیتے ہیں لہو تب کہیں پروان چڑھے ہیں 

رشتہ میرا ہر ایک تجوری سے بندھا ہے 

سونے کا نہیں طفل بھی کہ چین جو اسکا

آواز میں ماں کی کسی لوری سے بندھا ہے 

مجبور ہے ہر شخص نبھانے کے لیئے اب

اعلانیہ کوئی ، کوئی چوری سے بندھا ہے 

یہ جانتے وہ شخص تباہی ہے مگر کیوں 

خواہش سے بندھا ہے کوئی زوری سے بندھا ہے

ممتاز سبھی لوگ جو ممتاز ہوئے تھے

ہر ایک کا قصہ کسی بوری سے بندھا ہے

۔۔۔۔۔۔۔

مار دیتے ہیں/ اردو شاعری ۔ مدت ہوئی عورت ہوئے ۔ اضافی کلام ۔ اشاعت 2025ء

دل دہلتا ہے سوچ کر میرا 

کیسے دل سے اتار دیتے ہیں 

اپنے وقتی مفاد کی خاطر 

لوگ لوگوں کو مار دیتے ہیں

 

سرحدیں ہجرتیں دکھاتی ہیں 

پھول لیتے ہیں خار دیتے ہیں 

کوئی مسلک کا کوئی مذہب کا 

نام لیکر  شکار دیتے ہیں 

مدتیں ہو گئیں انہیں دیکھے

جو مقدر سنوار دیتے ہیں 

رہنما ایسے ہم نے پائے ہیں 

آر لیتے ہیں پار دیتے ہیں 

بیقراری نتیجہ ء الفت

جھوٹ ہے کہ قرار دیتے ہیں 

پشت پر تیر کے نشاں ہیں جو

اس زمانے کے یار دیتے ہیں 

جھوٹے وعدے فریب لفاظی

آرزو انتظار دیتے ہیں 

ہم سے نادان سچ سمجھتے ہوئے 

جان ممتاز وار دیتے ہیں

  ۔۔۔۔۔۔۔

 

مدت ہوگئی ہے۔ اردو شاعری ۔ مدت ہوئی عورت ہوئے ۔ اضافی کلام ۔ اشاعت 2025ء

تمہارے ساتھ سنگت ہو گئی ہے

یہی اک ہم سے عجلت ہو گئی ہے

بھلا سا نام تھا وہ دشمن جاں

بھلائے جس کو مدت ہو گئی ہے

ہمیں راس آ گیا ہے سرد لہجہ

ستم سہنے کی عادت ہو گئی ہے

نہیں دل چاہتا ملنا کسی سے

عجب سی اب طبیعت ہو گئی ہے

ہر اک شے میں کمی کرنے لگے ہیں 

بہت کم ہر ضرورت ہو گئی ہے

سفر تیزی سے طے ہونے لگا ہے

کٹھن تھی جو مسافت ہو گئی ہے

چھپانا ہے بڑا مشکل عمل کا

دکھاوے کی اجازت ہو گئی ہے

فرشتوں کو بھی دھوکا دے رہی ہے

بڑی مکار خلقت ہو گئی ہے

سند ممتاز ہونے کی ملے گی 

اگر صاحب سلامت ہو گئی ہے

۔۔۔۔۔۔۔۔۔۔