منقبت ۔ حسین بننا کمال ٹہرا/ اے شہہ محترم

منقبت

حسین بننا کمال ٹھہرا 

(کلام/ممتازملک ۔پیرس)

یزید بننا رزیل ٹہرا

 حسین بننا کمال ٹہرا

میری نبی  کی جھلک ہو جس میں

 حسین کا وہ جمال ٹہرا

بہت بڑا فرق ان میں ہے گر

نظر میں تیری نہ بال ٹہرا

حسین دے دے کے بھول جائیں

 یزید سکے اچھال ٹہرا

جواب جس کا نہ دے سکیں وہ

نہ ایسا کوئی سوال ٹہرا

جہاں پہ حق مستند کھڑا ہو

وہاں پہ باطل محال ٹہرا

چلے ہیں ممتاز جس سفر پر

عروج کو نہ زوال ٹہرا

          ........

تقریب دعوت

دعوت نامہ💐

3ستمبر 2019ء
بروز منگل
سہہ پہر 4 بجے،
پیرس میں مقیم نامور شاعرہ ' ادیبہ ' صحافی ' کالم نگار' اینکر پرسن  محترمہ ممتاز ملک کے  اعزاز میں ایک خصوصی نشست منعقد  کی جارہی ہے۔ جس میں  انکی چوتھی کتاب اور پہلے نعتیہ مجموعہ کلام
اے شہہ محترم (صلی اللہ علیہ)کی رونمائی بھی کی جائے گی۔
آپ تمام دوستوں کو  شرکت کی دعوت دیجاتی ہے ۔
منتظر میزبان :
فاطمہ قمر پاکستان قومی زبان تحریک
ایم ذیڈ کنول،چیف ایگزیکٹو جگنو انٹرنیشنل،
محمد جمیل،اکیڈمی آف لیٹرز
پتہ یہ ہے :
Pakistan academy of letters
22 J Gullberg -3 .
Near Firdos Market. Lahore.
0333 4305319
(جمیل صاحب (لاہور))

PIA تجھے کیا ہوا / کالم

   

    پی آئی اے تجھے کیا ہوا
          (تحریر:ممتازملک۔پیرس)

11 اگست 2019ء کی رات  8 بجے ہم لوگ پیرس سے  PK 770 میں سوار ہو چکے تھے ۔ 

میری سیٹ نمبر 42B تھی۔ جہاں پر پاکستان سے سوار ایک خاتون اور پیرس سے سوار ایک پختون نوجوان کے کیساتھ ہی میری سیٹ تھی ۔ جو میں نے درخواست کر کے کھڑکی والی سیٹ سے بدل لی ۔

نہ جہاز میں کوئی اخبار ، نہ رسالہ،  نہ ٹی وی ، نہ مووی نہ ڈرامہ ، دنیا کا سب سے بورنگ (بیزار کن ) سفر کرنا ہو تو پی آئی اے میں آیئے ۔ بوڑھے بچے جوان مرد و زن ، مجال ہے جو کسی کی بھی وقت گزاری کا یا دلچسپی کا کوئی سامان اس جہاز پر موجود ہو ۔ اس میں دو طرح کے لوگ ہی سفر کر سکتے ہیں جنہیں دو چار گھنٹے بچانے ہوں یا دو تین سو یورو ٹکٹ کے۔۔ورنہ دنیا کی اور کوئی وجہ ایسی نہیں ہے، نہ اس ایئر لائن کی کوئی خوبی یا سروس ایسی ہے کہ اس کی وجہ سے اس میں سفر کیا جائے ۔ 

ہم سے پہلے جہاز میں پاکستان سے بارسلونا جانے والے مسافر 8 گھنٹے کا سفر کرتے ہوئے اس میں موجودتھے ۔ جن میں بوڑھے بھی تھے اور بچے بھی ۔ ان میں کسی کے پاس نہ تو کوئی تکیہ تھا اور نہ  ہی کوئی کمبل تھا ، اور تو اور جہاز میں اے سی بھی نہ ہونے  کے برابر شاذو و  نادر ہی چلایا گیا تھا ۔

یہاں بھی میرا ہاتھ والا پنکھا ہی کام آیا ۔

بچے بیچارے سیٹ کی دستیوں پر سر رکھے سوتے جاگتے بیچین ہو رہے تھے ۔

بزرگ شرما شرمی کچھ ضرورتا بھی نہ مانگ پا رہے تھے ۔ وہ بھی سوچ رہے تھے جب جوان اور بچے بار بار لائٹ جلا کر انہیں بلاتے ہیں تو مجال ہے کہ کریو کا کوئی فرد آ کر دریافت کرے کہ

ہمارے بیٹھنے کے 3 گھنٹے  بعد جہاز پر کریو نے ایک ایک لنچ نکس تقسیم کیا ۔ اور ایک کپ چائے اور پیپسی کا گلاس دیا گیا ۔ لنچ بکس کھولا تو تو اس میں ایک عدد3 انچ لمبا کوئی بند کباب ٹائب تھا ، ایک عدد دو انچ کا پیٹیز ،

ایک عدد چھوٹا سا سادہ کیک کا ٹکڑا ، یہ اب رات کے 11 بجے ڈنر تھا، یا ناشتہ تھا ، یا مذاق تھا سمجھ نہیں آئی ۔ ۔ اس کے بعد جلدی جلدی 15 منٹ میں ہی خالی  ڈبے واپس سمیٹے گئے ۔ اور تمام جہاز کی روشنیاں بجھا دی گئیں اور کریو غائب ۔

ڈیڑھ گھنٹے کے بعد بارسلونا پہنچ کر جہاز اترنے سے محض پندری بیس منٹ پہلے روشنیاں کی گئیں ۔ جہاز میں اور تو اور پرواز کی خئی ڈائریکشن کسی سکرین پر نمودار نہیں ہو رہی تھی ۔ جہاز مسافروں سے مکمل طور پر بھرا ہوا تھا مجھے وہاں کوئی سیٹ خالی دکھائی نہیں دی ۔ کریو میں سے کوئی بھی پوچھنے ہر نہیں بتا پا رہا تھا کہ ہم کس مقام پر سفر کر رہے ہیں یا ہم کتنی دیر تک اپنی منزل پر پہنچیں گے ۔ بارسلونا پہنچ کر ساتھ کی نوجوان خاتون رخصت ہوئی اور مزید پاکستانی مسافر بارسلونا سے اسلام آباد کے لیئے جہاز میں سوار ہوئے۔ ہمارے ساتھ کی سیٹ پر ایک اور مہذب  پختون نوجوان کی آمد ہوئی ۔

رات کے دو بجے تک کئی بار لوگ لائٹ جلا کر سروس کریو کو کبھی بچوں کے دودھ کے لیئے ، کبھی پانی کے لیئے کبھی کسی اور ضرورت سے  بلا چکے تھے مجبورا مجھے سیٹ پر گھٹنے کے بل کھڑا ہو کر باآواز بلند احتجاج کرنا پڑا کہ بھائی کوئی ہے یہاں جو بار بار لائٹ بجھانے کے بجائے آ کر پوچھ سکے کہ جناب آپ کو کیا چاہیئے ۔ ۔ مجھے اپنی ساتھ والی سیٹ پر سے نوجوان لڑکے کو درخواست کرنے پڑی کہ بیٹا  جاکر کچن سے مردے جگائے اور پانی کی بوتل ہی لا دے ۔ اسے کافی دیر کھڑا رکھ کر ایک گلاس پانی دیا گیا ۔ جبکہ میں نے پوری بوتل کا مطالبہ کیا ۔ اور کہا کہ جناب ہم لائٹ آپ کا دیدار کرنے کو نہیں جلا رہے کسی کام سے ہی بلا رہے ہیں ۔ پوچھنے کی زحمت تو فرمائیں، کیا ہم شمر کے جہاز میں سوار ہو چکے ہیں ؟

میری سیٹ کے دائیں جانب کا پیڈل موجود ہی نہیں  تھا اور بائیں جانب کا بالکل فری تھا جو پاوں کو سہارا دینے کے بجائے پاوں کو تھکانے کا کام کر رہا تھا کیونکہ میں سیٹ بدل کر اس پر موجود تھی۔ کئی واش رومز اور ٹائلٹ کام ہی  نہیں کر رہے تھے اور مسافر سارے جہاز میں ٹوائلٹ کے لیئے آگے اور پیچھے واک کرتے رہے ۔

صبح کے ڈھائی بجے کھانا سروو کیا گیا ۔ جس میں سب سے ہلکے برانڈ کے چاول کے چار کھانے کے چمچ (یاد رہے یہ چاول یورپ کے ان مسافروں کو پیش کیئے گئے جو ایک سے ڈیڑھ انچ لمبا شاندار چاول کھانے کے عادی ہیں )  ،ایک جانب اس پر چار عدد مٹن کی بوٹیاں موٹے قیمے کی سائز کی اور دوسری جانب تڑکا لگے چاول پر مسور کی پرانی دال کا ایک چمچ ڈالا گیا تھا جو تقریبا سوکھ چکا تھا ۔ ایک پیالی میں سلاد کے پتوں پر دو انگوری سائز ٹماٹر اور ڈبے کی توں مچھلی کا قیمہ ایک چمچ پتوں پر ڈال رکھا تھا ۔ جبکہ میٹھے کے نام پر کھیر جیسا کچھ لگا چکھا تو معلوم  ہوا سیویاں دو چمچ دودھ ڈال کر اوپر بادام کی ہوائیاں چھڑکی گئی ہیں ۔ اور کافی دیر پرانی ہیں سو کھانے کے لائق نہیں تھیں ۔۔

4 بجکر 25 منٹ پر لائٹس آف کر دی گئیں ۔

چلیں ہمارے بولنے اور ساتھ میں کچھ اور مسافروں کے میری بات کی تائید کرنے اور شور کرنے پر کریو کو بھی تھوڑی مہمان نوازی دکھانی ہی پڑی ۔ اسی بہانے کھانا آرام سے کھانے اور پانی بھی ایک دو بار پوچھ لیا گیا ۔ 

یہ بات سمجھ سے بالاتر ہے کہ آخر پورے جہاز میں جو کام چار لوگ کر سکتے ہیں وہ کام دس لوگوں کو کرنے کو کیوں رکھا گیا ہے ؟  یہ تنخواہیں ہی تو سروس کی تباہی کا باعث ہیں ۔

برائے مہربانی ارباب اختیار ان شکایات کا جائزہ لیں ۔ اور تھوڑی سی حب الوطنی دکھاتے ہوئے جہاز کی حالت (مینٹیننس) اور عملے کی تربیت پر توجہ دیجیئے ۔ تاکہ ہم مسافروں کو یہ ایک آرام دہ اور یادگار سروس مہیا کر سکے ۔ سچ پوچھیں تو جس حالت میں اس وقت پی آئی اے کے جہاز سفر کر رہے ہیں،  دنیا کی کوئی ائیر لائن ایسے جہاز چلانے کا سوچ بھی نہیں سکتی ۔ اپنے مسافروں کو پی آئی اے کے کرتا دھرتاوں نے خود اس بات پر مجبور کیا ہے کہ وہ دوسری ایئر لائنز پر سفر کریں ۔ آخر کو ہم اپنا حق حلال کا پیسہ آپ کے پھٹے پرانے ناکارہ جہازوں پر  نالائق اور کام چور عملے کیساتھ سفر کر کے کیوں برباد کریں ؟ جبکہ دنیا کے بہترین جہاز ہماری میزبانی کرنے کو تیار ہیں تو ؟

کیا یہ ہماری حب الوطنی کی سزا ہے ؟

                       ۔۔۔۔۔

لہو لہو کشمیر اور طوفان بدتمیزی /کالم

لہو لہو کشمیر اورطوفان بدتمیزی
(تحریر:ممتازملک۔راولپنڈی)

اس وقت پاکستان میں سائلنسرز نکال کر بھدی آوازوں میں گا گا کر خود کو سب سے بڑا پاکستانی ثابت کرنے والے جوانوں 

کشمیر پاکستان کی وہی شہہ رگ ہے جس پر بھارت نام کے گیدڑ نے اپنے دانت گاڑ رکھے ہیں ۔کشمیر کے عورتوں کی عزتیں ہندوں دہشتگردوں کے نشانے پر ہیں ، کشمیری بچے ماوں کی گود سے چھین کر ہندو دہشتگروں کی بندوق کی گولی کھا رہے ہیں ، کشمیری جوان اور بوڑھے پاکستان کے اس جھنڈے کو اپنے مردہ جسموں لیکن زندہ روحوں پر کفن بنا کر پہن رہے ہیں جسے لہراتے ہوئے تمہیں بھونڈے ڈانس اور واہیات بھوں بھوں بجاتے ہوئے ذرا بھر حیا نہیں آتی۔ 

ملک پر لہراتے خطرات تم سے ذمہ داری کا تقاضا کرتے ہیں نہ کہ بھونڈے پن اور گھٹیا حرکات کا ۔ 

دشمن کو بتاو کہ ہم جاگ رہے ۔ یہ مت بتاو کہ ہم ناچ رہے ہیں ۔ 

جو قومیں اپنی غیرت پر تماچا برداشت کر لیتی ہیں ۔ انہیں پھر تماچے کھانے کا عادی ہونا پڑتا ہے ۔ 

اس وقت 13 اگست کی رات سے شروع ہونے والا طوفان بدتمیزی عروج پر ہے ۔ نہ کوئی سڑک پر اپنے گھر کی کسی خاتون کیساتھ نکل سکتا ہے ۔ نہ کوئی بیمار کسی ہسپتال تک پہنچایا جا سکتا ۔ نہ کوئی اپنے گھر جانے والا اپنے گھر پہنچ سکتا ہے ۔ وجہ سڑکوں پر بے قابو جوانوں کی ہلڑ بازیاں ، بدتمیزیاں ، اور بدمعاشیاں ۔ لگتا ہے آج انہوں نے ہر تمیز تہذیب سے آزادی حاصل کر لی ہے اور انہیں انہیں کے والدین کے اندھے مال نے بے غیرتی و بے حیائی لائسنس جاری کر رکھا ہے ۔ ان والدین کو یہ کون سمجھائے کہ طوفان پالنے والےسب سے پہلے اس طوفان کی نذر ہو جایا کرتے ہیں ۔ 

جوانوں کو پیروں کا استاد ہونا تھا لیکن یہاں تو جوانوں نے پیروں کی نیندیں حرام کر رکھی ہیں ۔ زندہ قومیں اپنی آزادی کے دن بھرپور وعدے وعید اور خود احتسابی کیساتھ منایا کرتی ہیں ۔ اپنی غکطیوں سے سیکھتی ہیں اور اپنے اگلی کل کے لیئے بہترین منصوبہ بندی کیا کرتی ہیں ۔ 

لیکن باجے بھوں بھوں ، بے تحاشا فائرنگ ، اونچے اونچے میوزک ٹریک لگا کر اپنے ارد گرد کے لوگوں کی نیندیں اجاڑ کر آپ کو یہ تک یاد نہیں رہا کہ جہاں دوسرے کی تکلیف شروع ہوتے ہیں وہاں آل کی آزادی کی حد ختم ہو جاتی ہے ۔ ہو سکتا ہے آپ کے پڑوس میں کوئی بیمار ہو ، کوئی طالبعلم مطالعہ کر رہا ہو ، کوئی بزرگ آرام کر رہے ہوں کوئی بچہ سو رہا ہو ۔ لیکن آپ کا یہ طوفان بدتمیزی ان کے دل سے آپ کے لیئے ایسی بدعا نکلنے کا باعث بن جائے کہ آپ ساری عمر اس کے حصار سے نہ نکل سکیں۔ 

اپنے ملک کی سلامتی اور کشمیر کی آذادی اور کشمیریوں کی سلامتی کے لیئے اپنا کردار ادا کیجیئے۔ کشمیر لہو لہو ہے ۔ اس کی آواز پر لبیک  کہیئے۔ دنیا کو بتا دیجیئے کہ زندہ قومیں اپنی عزتوں کی حفاظت کرنا جانتی ہیں ۔ 

                      ۔۔۔۔۔

رپورٹ تقریب رونمائی اے شہہ محترم (صلی اللہ علیہ وسلم )

تقریب رونمائی
"اے شہہ محترم"
(صلی اللہ علیہ وسلم )

4اپریل 2019ء بروز اتوار  کی شام پیرس کے ایک مقامی ریسٹورنٹ میں معروف شاعرہ ممتازملک کی چوتھی کتاب ، ان کے پہلے نعتیہ  مجموعہ کلام "اے شہہ محترم" (صلی اللہ علیہ وسلم)کی خوبصورت تقریب رونمائی کا انعقاد فرانس میں پاکستانی خواتین کی پہلی ادبی تنظیم "راہ ادب" کے زیر اہتمام کیا گیا ۔ جسمیں میں مقامی ادبی تنظیمات ، شعراء کرام اور شرکاء نے بھرپور شرکت کی ۔
پروگرام کی نظامت ممتازملک اور روحی بانو نے کی ۔  پروگرام کا باقاعدہ آغاز قاری جاذب کی تلاوت کلام پاک سے ہوا ۔ زاہد محمود چشتی نے خوبصورت لحن کیساتھ نعت رسول مقبول صلی اللہ علیہ وسلم پیش کرنے کی سعادت حاصل کی۔
اسکے بعد پروگرام کو دو حصوں میں پیش کیا گیا ۔ پہلے حصے میں شعراء کرام نے ممتاز ملک کے نعتیہ مجموعے کی اشاعت پر انہیں مبارکباد پیش کی اور اس کتاب پر اپنے بھرپور تبصرے پیش کیئے ۔ جبکہ دوسرے حصے میں  شعراء کرام نے اپنا اپنا کلام پیش کیا ۔ جسے شرکاء نے دل کھول کر داد دی ۔ شعراء کرام میں بزم اہل سخن کی جانب سے عاکف غنی ، ایاز محمود ایاز، نبیلہ آرزو ،
پنجابی ادبی سنگت سے عظمت نصیب گل، وقار ہاشمی ،
بزم صدائے وطن سے مقبول شاکر، راجہ زعفران ، عاشق حسین رندھاوی ، ممتازاحمد ممتاز،
راہ ادب کی جانب سے ممتازملک ، شمیم خان ، روحی بانو نے شرکت کی اور اپنا اپنا کلام سنا کر سامعین و حاضرین سے داد وصول کی ۔
  ان کے علاوہ ممعروف ناول نگار،  افسانہ نگار ، کالمنگار اور شاعرہ محترمہ  شاز ملک صاحبہ نے خصوصی شرکت فرمائی اور کتاب پر اپنا خوبصورت اور جامع تبصرہ پیش کیا ۔ اپنے کلام سے حاضرین کو نوازہ اور خوب داد پائی ۔
 نئے شاعر قاری جاذب نے اپنا کلام پیش کیا ۔ جبکہ دو نئے خوش لحن گلوکاروں ظل عمر اور  ضیاء صاحب نے اپنی آواز میں صوفیانہ کلام کا جادو بکھیرا۔
اس پروگرام کی خاص بات ایک نئے شاعر اور دو گلوکاروں کی پہلی بار شرکت تھی وہیں خواتین کی بڑی تعداد میں شرکت نے ادبی محفل کو حوصلہ بخشا۔ جبکہ تقریب کا وقت پر شروع ہونا اور وقت پر اختتام  اور شرکاء کا وقت پر پہنچنا ایک بہت ہی خوبصورت تجربہ رہا ۔ اس نعتیہ مجموعہ کلام اے شہہ محترم (صلی اللہ علیہ وسلم ) کی اشاعت سے ممتازملک کا نام فرانس کی پہلی خاتون نعتیہ شاعرہ کے طور پر ہمیشہ یاد رکھا جائیگا ۔ جبکہ یورپ بھر میں بھی شاید چند ہی خواتین ہیں جنہیں نعتیہ مجموعہ کلام لکھنے کی سعادت حاصل ہوئی ہے ۔ جس کے لیئے انہیں تہہ دل سے سراہا گیا۔
پروگرام کے مہمان خصوصی راز میں تھے ۔ جو ان کے شوہر محمد اختر شیخ تھے۔ ممتاز ملک نے انہیں کتاب کا فیتہ کاٹنے کے لیئے یہ کہہ کر بلایا کہ میری زندگی کی سب سے خاص اور مبارک کام کے لیئے مجھے میرے شوہر سے زیادہ کوئی بھی مہمان خصوصی کے طور پر موزوں دکھائی نہیں دیا ۔ کیونکہ ان کی پشت پناہی اور حوصلہ افزائی کے سبب ہی آج میں ممتازملک ہوں ۔
حاضرین و شعراء کرام نے کامیاب پروگرام کے انعقاد پر ٹیم راہ ادب کو اور "اے شہہ محترم" (صلی اللہ علیہ وسلم )کی شاعرہ ممتاز ملک کو دلی مبارکباد پیش کی ۔
پروگرام کے اختتام پر مہمانوں کے لیئے کھانے کا اہتمام کیا گیا۔
                 ۔۔۔۔۔۔ 
فی الحال جو تصاویر مل پائی ہیں وہ حاضر ہیں ۔ مذید تصاویر موصول ہوتے ہیں شامل کر دی جائینگی۔

شکریہ شرکت پروگرام/ رپورٹس

شکریہ دوستو

8
السلام علیکم دوست
آپ کی آمد کا بیحد شکریہ ۔
آپ نے ہماری محفل میں اپنی شرکت سے روشنی بھر دی۔جس کیلیئے ہم تہہ دل سے آپ کے ممنون ہیں ۔ امید ہے محبت اور خلوص کا یہ سفر جاری رہیگا ۔ خوش رہیں سلامت رہیں ۔    
والسلام:ٹیم راہ ادب ممتازملک ،شمیم خان، روحی بانو

دعوت نامہ/رونمائی/اے شہہ محترم

السلام علیکم دوستو
معروف شاعرہ ممتازملک کی چوتھی کتاب اور پہلے نعتیہ مجموعہ کلام
اے شہہ محترم
(صلی اللہ علیہ وسلم )
کی تقریب رونمائی
4اگست 2019ءبروز اتوار
سہہ پہر 4 بجے
منعقد کی جارہی ہے۔جسمیں آپکی شرکت ہمارے لیئے باعث مسرت ہو گی ۔
والسلام : ٹیم راہ ادب
ممتازملک،  شمیم خان، روحی بانو
بمقام :    Restaurant Kerwan
119 Boulevard Charles de Gaulle, 93380 Pierrefitte-sur-Seine
Contact :07 50 00 87 86
      //      :06 24 09 24 35

نکاح نامے کیساتھ کچھ اور بھی/ کالم

نکاح نامے کیساتھ کچھ اور بھی 

                   (تحریر: ممتازملک.پیرس)

سنا ہے ایک نئے حکم کے تحت حکومت نے شادی کے لیئے شناختی کارڈ کی شرط، اٹھارہ سال کی عمر کو لازمی قرار دے دیا ہے ۔ میں حکومت کے اس اقدام کی بھرپور حمایت کرتی ہوں ۔

کچھ لوگوں کا خیال ہے کہ یہ غلط ہے اور اس سے  بے راہ روی کو فروغ ملے گا ۔ جبکہ ہم سمجھتے ہیں کہ بےراہ روی کو فروغ تو ہمارے ہاں کے اکثر شادی شدہ اور رنگین مزاج بوڑھوں نے ویسے ہی دے رکھا ہے ۔ بچوں کی یہ ٹین ایج ان کی پڑھائی اور مستقبل کے لیئے کوئی ہنر سیکھنے اور اپنے پاوں پر کھڑا ہونے کی عمر ہوتی ہے ۔ سو طرح کے جذباتی مدوجزر کا دور ہوتا ہے یہ۔جس میں نوجوان پل پل نئے سوچ کے تجربات سے گزرتے ہیں اور ہوا کے گھوڑے پر سوار ہوتے ہیں ۔ جب وہ اپنے آپ کو سنبھالنے کے لائق بھی نہیں ہوتے ، یہاں تک کہ تمیز سے بات کربے اور چھوٹے بڑے کی تمیز سے بھی نالاں ہوتے ہیں  تو ایسے میں لڑکے پر ایک جیتی جاگتی لڑکی مطلب ضروریات کی پوٹ کو لاد دینا کہاں کی عقلمندی ہے ؟ 

اور لڑکی پر ایک پورے کنبے اور اپنے بھی بچوں کی پیدائش و پرورش کا بوجھ لادنا کہاں کی سمجھداری ہے؟

 اب اگر کوئی پھر سے پہلے زمانے کی مثالیں دینے لگے تو یاد رکھیئے ہر زمانہ پہلے زمانے سے مختلف ہوتا ہے ۔ اس کے اپنے تقاضے ہوتے ہیں ، اس کی اپنی سوچ اور طرز زندگی ہوتا ہے ۔ 

پہلے زمانے میں  وہ طرز زندگی تھا جو آج ہے ؟

وہ خوراک اور پکوان تھے جو آج ہیں ؟

وہ پہناوے تھے جو آج ہیں ؟

ان چیزیوں کا کوئی تصور تھاجو آج لازمی سمجھی جاتی ہیں ؟(جیسے کہ  ہنی مون ، نیٹ ، کمپیوٹرز ،LED , موبائل ، ککنک رینج ۔۔۔)

پہلے سال بھر میں ہر شخص کے تین جوڑے کپڑے،  ایک جوڑا جوتے، اور پیٹ بھر گندم دال، چاول، گڑ ، گندم گودام میں موجود ہے تو بندہ بادشاہ ہوا کرتا تھا ۔ 

ائک ہی کمرے میں پچیس بندے سو جاتے تو بھی انہیں کوئی فرق نہیں پڑتا تھا ۔ نہ محرم تھا نہ نامحرم۔

لیکن آج تو ان چیزوں پر گزارے کا سوال ہی پیدا نہیں ہوتا ۔ زندگی کے تقاضے بدلے ہیں ، سوچ بدلی ہے ، تو انداز بھی بدلنا ہو گا ۔ 

تتلیاں پکڑنے کی عمر ، خواب دیکھنے کی عمر  ، شرارتیں کرنے کی عمر ، کھل کر ہنسنے کی عمر کو بچوں اور کنبے کی پرورش کے چولہے میں مت جھونکیئے خدارا۔

وقت سے پہلے بوڑھے ہوتے ہوئے ان جوڑوں پر ترس کھائیے، جو پینتیس سال کی عمر تک پہ پہنچتے پہنچتے  سر سفید ، کمر ٹیڑھی کروا چکے ہوتے ہیں ، دس بیماریوں میں مبتلا ہو چکے ہوتے ہیں ۔ اپنی عمر سے بیس سال بڑے لگنے لگتے ہیں ۔ 

رہی بات بے راہ روی کی تو اس کے لیئے عمر کی کوئی شرط عائد نہیں ہوتی ۔ انسان باکردار ہو اس کی اخلاقی و دینی تربیت اچھی ہو ، تو وہ ٹین ایج جیسی آزمائشی عمر میں بھی پارسائی اختیار کر سکتا ہے ، اور اگر انسا بدکردار ہو تو ستر برس کی عمر میں بھی ایک پاوں قبر میں اور ایک پاوں بدکرداری کے کیلے کے چھلکے پر ہی رکھے گا ۔ 

ہم سمجھتے ہیں کہ  18 سال کی عمر کے بجائے لڑکی کی عمر شادی کے لیئے  کم از کم بیس بائیس سال ضرور ہونی چاہیئے خاص طور پر ہمارے ایشین معاشروں میں جہاں شادی کے روز شوہر کے گھر کی دہلیز پر قدم رکھتے ہی اس سے چالیس سال پختہ کار خاتون کی سی توقعات وابستہ کر لی جاتی ہیں ایسے میں وہ معصوم بچی جس کی نہ ابھی تعلیم مکمل ہوئی ہے ، نہ اسے کوئی ہنر آتا ہے ، نہ اسے گھر بار سنبھالنے کی سمجھ ہوتی ہے بیچاری رل کھل جاتی ہے ۔

 لڑکے کی عمر بھی کم از کم 26 ، 27 سال ہونی چاہیئے تاکہ وہ شادی کو کوئی کھیل نہ سمجھے بلکہ پڑھ لکھ کر ، باہنر ہو کر اپنے پاوں پر کھڑا ہو اور اپنی بیوی کی ذمہ داریاں بحسن و خوبی اٹھا سکتا ہو ۔ ہم اس سے کم سنی کی شادیوں کو انتہائی تکلیف دہ سمجھتے ہیں ۔

 ہم حکومت کی اس اقدام کی حمایت کرتے ہیں  بلکہ مذید یہ مطالبہ کرتے ہیں کہ ہمارے ہاں بڑھتی ہوئی آوارگی اور بدکردار پیروں اور بابوں کی بڑھتی ہوئی تعداد کے پیش نظر اب نکاح نامے کیساتھ لڑکے اور لڑکی کا اس کے والدین کیساتھ DNA رپورٹ اور بڑی بیماریوں اور اپاہج اولاد کی پیدائش کی  آزمائش سے بچنے کے لیئے میڈیکل رپورٹ بھی ضرور نتھی کی جائے ۔ تاکہ ان پیچیدہ اور عمر بھر کا روگ بن جانے والے معاملات سےحتی المقدور بچا جا سکے۔ 

                ۔۔۔۔۔۔۔

جلدی کھلنا/ چھوٹی چھوٹی باتیں

کھلنا رلنا

جو جتنی جلدی کھلتا ہے 

وہ اتنی جلدی رلتا ہے 

               (چھوٹی چھوٹی باتیں)

             (تحریر:ممتازملک.پیرس)

سوچیئے زرا دور تک /کالم

          سوچیئے زرا دور تک

                     (تحریر:ممتازملک۔پیرس)

ے

دنیا کے حسین ممالک کا نام لیا جائے تو بلا شبہ پاکستان کا شمار ان ابتدائی ایک درجن ممالک میں کیا جا سکتا ہے  جنہیں پروردگار نے بہترین لینڈ سکیپ سے نواز  رکھا ہے ۔ کھلے میدان ہوں یا چٹیل پہاڑ ، ریگزار ہوں یا گلزار وادیاں ، دریا ہوں یا سمندر، برف پوش وادیاں ہوں یا نمکین اور خزانوں سے پر پہاڑ ۔ موسم دیکھیں تو کونسا موسم ہے جو قدرت نے اس حسین ملک کو عطا نہیں کر رکھا ۔ لوگوں کو دیکھیں تو بلا کی خوبصورتی اور ذہانت سے مالامال قوم ۔ پھر بھی ہم کرپشن میں، جھوٹ میں ، منافقت میں ،جرائم میں کیوں گنے جاتے ہیں ۔ ہمیں اس بات کی شدید ضرورت ہے کہ ہم اپنی کردار سازی پر خصوصی توجہ دیں ۔ ہمارا آئیڈیل مذہب میں ہمارے نبی پاک صلی اللہ علیہ وسلم کی ذات مبارکہ ہے کہ جس کی کسی بھی میدان میں اس سے اچھی مثال موجود ہی نہیں ہے تو ایک محنتی انسان اور رہنما کے طور پر بہترین انسان کی صورت محمد علی جناح قائد اعظم کی صورت ہمارے سامنے ہے جن کی وفات کو بھی ستر برس سے زائد گزر چکے ہیں لیکن آج بھی ان کے مخالفین ان کے کردار و گفتار میں کبھی کوئی غلطی نہ نکال سکے ۔ پھر کیا وجہ ہے کہ ہم نے اپنی اچھی مثالوں کو چھوڑ کر بری عادتوں کو  اپنی زندگی  میں شامل کر لیا ہے ؟ 

محض چھوٹے چھوٹے وقتی مفادات کی خاطر ہم اپنے اعتبار اور ایمان دونوں کو کرچی کرچی کروا لیتے ہیں ۔ کہیں بھی جائیں اور وہاں سے گندگی چھوڑے بنا واپس آنا ہمیں مشکل لگتا ہے ۔ ہر ایک کو ہماری چھوڑی ہوئی گندگی ہی سے کیوں یہ یاد رہے کہ ہاں یہاں سے کوئی پاکستانی گزرا ہے۔ اس کے لیئے ہماری نفاست اور شائستگی بھی تو ہمارا تعارف بن سکتی ہے ۔  

ہم آہستہ اور تمیز سے بولنے ، سچ بولنے ، ہر چھوٹی سے چھوٹی بات میں  شکریہ ادا کرنے ، ہر معمولی سی بات  پر  بھی "معاف کیجیئے گا" کہنے کو اپنی عادت اور  اپنے بچوں کی گھٹی میں  ڈال لیں تو کیا ہی بات ہے ۔ ہم عورتوں کی بچوں کی عزت اور حفاظت کو خود پر اسی طرح فرض کر لیں جیسے ہمارے نبی پاک صلی اللہ علیہ وسلم اور قائد اعظم کا طرز عمل تھا تو کون ہے جو ہمیں پاک ستان بننے سے روک سکے، ہم نے پاکستان  تو بہتر برس قبل ہی حاصل کر لیا تھا لیکن اسے پاک لوگوں کی سرزمین بنانے میں اور کتنے سال درکار ہیں ؟

ہمارے اس دنیا سے جانے کے وقت کیا ہم اس پاکسان سے بہتر پاکستان چھوڑ کر جا رہے ہونگے جو ہمیں ہماری پیدائش پر ملا تھا ؟

پاکستان صرف نعروں سے زندہ باد نہیں ہو سکتا بلکہ اسے اپنے عمل سے زندہ باد کیجیئے۔ 

اس ملک سے پیار کیجیئے ۔ اس کی قدر کیجیئے ۔ کیونکہ بےقدروں کی دنیا میں کوئی جگہ نہیں ہوتی ۔ 

                         پاکستان زندہ باد

                      ۔۔۔۔   

  

المدثر کفالت عشائیہ۔ رپورٹ

رپورٹ:

(ممتازملک.پیرس )

شام 21 جولائی 2019ء پیرس کے ایک مقامی ریسٹورنٹ میں المدثر ٹرسٹ کھاریاں کی جانب معذور اور یتیم بچوں کی کفالت کے حوالے سے ایک فنڈ ریزنگ ڈنر کا اہتمام کیا گیا ۔ جس میں مقامی مخیر حضرات کی ایک بڑی تعداد نے شرکت کی ۔ پروگرام کی نظامت ملک منیر صاحب نے کی اور  پروگرام کا آغاز حافظ معظم کی آواز میں خوبصورت تلاوت کلام پاک اور نعت رسول مقبول صلی اللہ علیہ وسلم سے ہوا ۔  جبکہ خصوصی  نظامت انگلینڈ سے تشریف لائے معروف ٹی وی اینکر جناب مظہر بخاری صاحب نے کی ۔  المدثر ٹرسٹ کے بانی جناب مدثر حسین شاہ صاحب نے بہت جامع انداز  میں  حاضرین کو اپنے اس ٹرسٹ کی بیس سالہ روداد اور اس سفر کی کہانی سنائی۔ جو کہ انتہائی متاثر کن تھی ۔ پروگرام مہمانوں کے تاخیر سے آنے کی وجہ سے دو گھنٹے تاخیر سے شروع ہوا ۔ جبکہ اپنے گھر سےخواتین کو ساتھ نہ لانا ہمارے پاکستانی بھائیوں کا پرانا احساس شرمندگی ہے ۔ جس کے سبب نہ وہ ادبی محافل کو اور نہ ہی چیرٹی پروگرامز کو اس قابل سمجھتے ہیں کہ ان  کے گھروں سے خواتین ان میں شرکت فرمائیں ۔ ویسے افسوس کا مقام ہے کہ  یہ انہیں ساری رات شادی بیاہ میں ، میلوں میں فیشن شوز میں ، موسیقی کے کنسرٹس میں ، بازاروں میں  سارا دن گھومنے کی اجازت تو  خوشی دے سکتے ہیں لیکن ادبی محافل اور خیراتی پروگرام ان کے لیئے شجر ممنوعہ ہیں ۔ ہم بیس سال سے انتظار کر رہے ہیں کہ وہ اپنی گھریلو  خواتین کے حوالے سے اپنی عقل پر لگایا ہوا یہ ڈھکن کب کھولتے ہیں ۔ پروگرام میں معروف قوال شہباز ، فیاض اور ہمنواوں نے خوب رنگ جمایا ۔ پروگرام کے اختتام پر عشائیے کا اہتمام کیا گیا تھا ۔ پیش ہیں پروگرام کی کچھ تصویری جھلکیاں

گھریلو سازشیں / کالم کہانیاں

گھریلو سازشیں 

   تحریر:(ممتازملک.پیرس )

مشترکہ گھروں میں نئی بہو کے آتے ہی کچھ چالاک دماغ اپنے اپنے گھریلو سیاسی کھیل کا آغاز کر دیتے ہیں ۔ جیسے کہ ایک گھر میں چار بھائی رہتے ہیں ۔ ان میں کوئی سیدھا سادھا ہوتا ہے تو کوئی مکار، کوئی محنتی ہوتا ہے اور کوئی کام چور ۔ اکثر لوگوں کی زبانی سننے میں آتا ہے کہ بہو نے گھر آتے ہی بھائیوں میں دراڑ ڈالدی۔ یا پھر گھر میں گھر کے کاموں کو لیکر ہنگامہ آرائی کا آغاز ہو گیا ہے ۔ کوئی بھی لڑکی شادی کے بعد گھونگھٹ اٹھاتے ہی نہ تو بدتمیز ہوتی ہے، نہ کام چور ۔ کیونکہ اسے اس گھر میں خود کو کارآمد اور سگھڑ ثابت کرنا ہوتا ہے ۔ سب کے دل میں اپنی جگہ بنانی ہوتی ہے ۔

گھر  کے کام سبھی گھر کے لوگوں کو مل جل کر کرنا ہوتے ہیں ۔ ایک نے کھانا بنایا تو دوسرے نے برتن دھو دیئے ، صفائی کر دی۔ ایک نے کپڑے دھوئے تو کسی نے کپڑے استری کر دیئے تب تک تو گھر کا انتظام بہترین انداز میں چلتا رہتا ہے ۔ 

ایسے میں وہ چالباز بھائی جو دوسروں کے سر پر اپنا رعب جمانا چاہتا ہے وہ اپنی بیوی کو کام چوری اور زبان دراز ی کے گر سکھاتا ہے ۔ وہ اپنی بیوی کو نہ صرف مہارانی بنانا چاہتا ہے بلکہ دوسرے بھائیوں کے مال پر بھی نظریں گاڑ کر بیٹھا ہوتا ہے ۔ اس کی اکثر توجہ اس بات پر ہوتی ہے کہ ساری بھاوجوں کو اپنی بیوی کی باندیاں بنا کر رکھے ۔ جبکہ دوسری بھاوجیں اس بات پر کڑھنا شروع کر دیتی ہیں کہ ہم سب کا رشتہ ایک سا ہے تو یہ نوابزادی کون ہوتی ہے ہمیں اپنی ملازمہ بنانے والی ۔ یوں کم گو اور شریف یا بزدل بھائی جب اپنی بیوی کے ساتھ ہونے والی زیادتی پر خود آواز نہیں اٹھاتا تو بیوی خود اپنے خلاف ہونے والی زیادتی پر صدائے احتجاج بلند کر دیتی ہے ۔ جس پر سازشی یا بدمعاش بھائی بجائے اپنی حرکتیں درست کرنے کے اور معذرت کرنے کے اپنے بھائی بھابی کیساتھ فساد کا اور بدزبانی کا آغاز کر دیتا ہے ۔ یوں گھروں میں فساد،  بٹوارے ، اور رشتوں کی  کھینچا تانی کا آغاز ہو جاتا ہے ۔ 

اگر گھروں کے بیٹے اپنے بیویوں کو بھڑکانے اور دوسروں کو دبانے کا سبق دینے کے بجائے سب کو اپنی مرضی سے  بانٹ کر کام کرنے کا موقع دیں اور گھر کی بہووں کو سمجھا دیں کہ یہ گھر سب بہووں کا برابر کا ہے اور اس کو سنبھالنے کی ذمہ داری بھی سب پر برابر کی عائد ہوتی ہے ۔ اور کوئی کسی پر پردھان بننے کی کوشش نہ کرے ۔ اور آپس میں بہوئیں مل کر کام کا دن طے کر لیں ۔ تو یقین جانیں کسی بھی گھر میں بدنظمی اور ناچاقی کا سوال ہی پیدا نہیں ہوتا ۔

ایسے میں اگر گھر میں نندیں بھی موجود ہیں تو انہیں بھی ان کاموں میں برابر کی شراکت داری دی جائے اور انہیں مہمان یا بچیاں کہہ کر بھاوجوں پر مسلط کرنے کی کوشش ہر گز مت کیجیئے ۔  کیوں کہ یاد رکھیں مہمان ایک دو دن کے لیئے آکر ٹہرنے والے کو کہا جاتا ہے ۔ مستقل سب کے سر پر سوار ہونے والے کو یا روز روز آ دھمکنے والے کو نہیں ۔ 

وقتی طور پر اگر آپ کسی کو خوش کرنے کے لیئے ایسی بہنوں کی طرفداری کر بھی لیں تو اس سے ایک۔تو وہ بہنیں نکمی اور کام چور بن کر اپنے سسرال میں آپ کی  ناک کٹوائیں گی دوسرا  ان رشتوں ( نند بھاوج ) کے بیچ جو کڑواہٹ پیدا ہو جائے گی وہ تاحیات کسی طور پر جانے والی نہیں ہو گی ۔ بہنوں کو اپنی بیویوں کے معاملات میں دخل دینے سے باز رکھیں ۔ کیونکہ شادی شدہ بہن یا بھائیوں کی زندگی میں ان کے ساتھی کے معاملات میں آپ کی دخل اندازی اسے اگر وقتی طور پر نقصان پہنچا بھی دے تو آپ ہمیشہ کے لیئے اپنے ہی بہن یا بھائی کی نظر سے بھی گر جائینگے بلکہ خدا کے حضور بھی میاں بیوی میں  جدائی ڈالنے والے شیطان کے چیلوں میں شمار کیئے جائینگے ۔ جس کا ٹھکانہ جہنم کے سوا کچھ اورنہیں ۔ 

                      ۔۔۔۔۔۔پ

مشاعرہ اہل۔سخن/ رپورٹس

رپورٹ:

(ممتازملک.پیرس)

ادبی تنظیم بزم اہل سخن کے زہر اہتمام  14 جولائی 2019ء بروز اتوار پیرس کے ایک مقامی ریسٹورنٹ میں کینیڈا سے تشریف لائی ہوئی ایک پختہ لہجے کی نوآموز شاعرہ محترمہ شمیلہ شاد صاحبہ کے اعزار میں ایک شعری نشست کا اہتمام کیا گیا ۔ جس میں ادبی تمظیمات پنجابی ادبی سنگت اور راہ ادب نے بھی بھرپور شرکت کی ۔ مقامی شعراء نے اپنے کلام سے شرکاء سے داد سمیٹی، جبکہ شمیلہ شاد صاحبہ  جو  کئی سال سے کینیڈا میں بطور ماہر نفسیات بھی اپنی ذمہ داریاں ادا کرتی رہی ہیں،  نے حال ہی میں اپنا کلام منظر عام پر لانے کا ارادہ کیا اور اپنا کلام اہل ذوق کے سامنے پیش کیا ۔ جسے خوب سراہا گیا ۔ مقامی شعراء میں عاکف غنی، ایاز محمود ایاز ، نبیلہ آرزو ، آصف محمود آسی ، شازملک،  ممتازملک، عظمت نصیب گل، نے اپنے کلام سے شرکاء کو محظوظ کیا ۔
 بزم اہل سخن کے سرپرست اعلی جناب نعمت اللہ شیخ صاحب نے شرکاء کو فیض احمد فیض کا منتخب کلام سنایا اور ان کی آمد پر ان کا شکریہ ادا کیا ۔ پروگرام کے آخر میں مہمانوں کے لیئے پرتکلف عشائیے کا اہتمام کیا گیا تھا۔ پیش ہیں پروگرام کی کچھ تصویری جھلکیاں ۔۔

   

سنت کی اوٹ، فرائض سے فرار/ کالم

  سنت کی اوٹ،

               فرائض سے فرار

                  (تحریر:ممتازملک.پیرس)

بیشک اللہ ایک ہے اور محمد صلی اللہ علیہ وسلم اللہ کے رسول ہیں ۔ اللہ کے آخری نبی ہیں اور آپ صلی اللہ علیہ وسلم پر اللہ نے اپنی پیغمبروں اور رسولوں کے سلسلے کو مکمل کر دیا ۔ اب قیامت تک کوئی نیا نبی نہیں آئے گا ۔ حضرت محمد مصطفے صلی اللہ علیہ وسلم کی زندگی پاکیزگی ، سچائی ، امانت داری،  ایمانداری،  ایفائے عہد یعنی وعدہ نبھانے کے ساتھ ہر اس خوبی کی عملی تفسیر ہے جس کا کسی بھی بہترین انسان سے اللہ پاک کا تقاضا ہے ۔ اللہ پاک نے انسان کو جو بھی احکامات پیارے نبی و رسول کے ذریعے انسانیت تک بھیجیے ان سب پر عمل کرنے کی پہلی ذمہ داری اپنی نبی اور رسول پر ہی ڈالی ۔ تاکہ عام انسان ان احکامات سے بچنے کے لیئے حلیے نہ تراشے ۔ اور اس کے لیئے اس نے اپنے پیغمبروں کو انسانی جسم اور انسانی ضروریات کیساتھ بھیجا۔ وہ چاہتا تو اپنے احکامات پر عمل درآمد کے لیئے فرشتوں کو زمین پر اتار کر ہم سب پر مسلط کر دیتا ۔ اور ہم  انکے احکامات ماننے پر مجبور ہوتے۔ اس وقت ہمارے دل و دماغ میں خود کو غلام اور بے بس سمجھے کا خیال رہتا۔ ظاہر ہے نہ فرشتوں کو بھوک لگتی ہے ، اور نہ ہی ان کے جذبات ہوتے ہیں ۔وہ تو اللہ کے ہر حکم پر صرف جی جناب ہی کہتے ہیں ۔ گناہ کا فرشتوں سے کوئی تعلق نہیں ہے ۔ تو وہ ہمیں کوئی حکم خود پر گزار کر، محسوس کر کے کیسے بتا سکتے تھے ۔ کیونکہ وہ انسانی جذبات، ضروریات ،اور خواہشات سے پاک ہوتے ہیں ۔ اسی لیئے اللہ پاک نے کمال مہربانی فرماتے ہوئے انسانوں پر انسانی وجود میں ہی نبی اور رسول اتارے ۔  اور ان کے ذریعے انسانوں کو بتایا کہ اس کا کوئی بھی حکم ایسا نہیں ہے جسے عام انسان باسہولت بجا نہ لا سکے ۔
آج کے زمانے تک آتے آتے مسلمانوں میں اللہ تعالی کے احکامات سے راہ فرار اختیار کرنے کے بڑے بڑے حیلے بہانے اختیار کیئے ہیں ۔ لیکن خود سے ماننا بھی نہیں کہ وہ اللہ تعالی کے احکامات سے روگردانی کر رہا ہے ۔ تو اپنے ضمیر اور لوگوں کو دھوکا دینے کے لیئے  نیکی کا کوئی سرٹیفیکیٹ بھی اپنے چہرے پر چپکانا چاہتا ہے۔ جس کے لیئے اس نے اللہ کے وہ احکامات جو ہمارے ایمان اور حساب کتاب کی بنیاد بنائے گئے ہیں۔ جن کے بنا بخشش ہی ممکن نہیں ہے ، کے بجائے نبی پاک صلی اللہ علیہ وسلم کے حلیہ مبارک کی نقل کو احکام الہی کی جگہ لا کر  رکھ دیا ۔ 
  اللہ کے نبی کا کردار  (جس کے لیئے اماں عائشہ رضی اللہ تعالی عنہا فرماتی ہیں کہ جو قران ہے وہ رسول اللہ کا اخلاق و کردار ہے اور جو رسول اللہ کا اخلاق و کردار ہے وہی قرآن ہے۔) کا ان کی نظر میں کوئی مقام ہونے کے بجائے جہاں سنو نبی پاک کے حلیئے کی نقل پر شور مچایا جاتا ہے ۔ جب سوال کرو کہ کیا اللہ کے احکامات کی مکمل پیروی کرتے ہو تو بجائے جواب دینے کے آپ پر کفر کے فتوی لگانے لگائے گا۔ آپ کو مارنے دوڑے گا ۔ یعنی اپنی بدکرداریوں پر نبی پاک صلی اللہ علیہ وسلم  کے حلیئے کی نقل کا پردہ ڈال دیگا۔ گویا وہ فرائض سے بھاگ کر سنت کی آوٹ میں چھپنا چاہتا ہے ۔

جبکہ  سنت تک پہنچنے کے قابل ہونے کے لیئے پہلے فرائض کا پل صراط پار کرنا پڑتا ہے ۔ اس کے بعد سرکار صلی اللہ علیہ وسلم کی سنت کے لائق ہوا جاتا ہے ۔
روز حشر فرائض کے سوالات کیئے جائینگے۔ سنت کی باری بعد میں آئے گی ۔ فرائض پر ہی جنت اور جہنم کے فیصلے ہونگے۔ جب سنت ادا ہوئی تو مذید اچھا اور ادا نہ ہو پائی تو اس پر کوئی سزا قرآن پاک میں کہیں نہیں سنائی گئی۔
دیکھیئے تو خود مسلمانوں نے ہی سنت کا تماشا بنا کے رکھ دیا ہے۔  کیا حق ہے کسی چور اچکے بدکار ، اغوا کار، ڈاکو ، راشی ، جھوٹے ، بے نمازی ، والدین کے نافرمان ، اپنی اولاد اور بیوی کے حقوق سے متنفر و بے فکر ، بہن بھائیوں کا جانی دشمن، لچے ،تلنگے  ، زانی کو میرے پیارے نبی صلی اللہ علیہ وسلم کی سنت اپنی غلیظ صورت پر چپکانے کی ۔ 
نبی صلی اللہ علیہ وسلم  کی ریش مبارک کوئی فیشن نہیں ہے نبی پاک صلی اللہ علیہ وسلم کے امتی ہونے اور ان کا کردار (یعنی قرآنی احکامات کی پیروی ) ہونے کی پہچان اور اعلان ہے ۔ ورنہ محض توہین رسول صلی اللہ علیہ وسلم ۔۔۔۔۔
کم از کم میں بطور ماں اپنے بیٹے کو اس وقت تک داڑھی رکھنے کی اجازت نہیں دونگی جب تک اس کے دل میں خدا خوفی پیدا نہ ہو جائے ۔ وہ اللہ کے احکامات پر عمل کرنے والا اور اپنے  فرائض احسن انداز میں ادا کرنے والا نہ ہو جائے۔
کیونکہ یہ فرائض ادا کرنے ، حقوق العباد ادا کرنے والے سے محبت کرنے والے رب  کی اپنی محبوب ترین ہستی کے چہرے کی رونق کا معاملہ ہے کوئی مذاق نہیں ۔۔۔
                     ۔۔۔۔۔۔

● بٹ گئی ۔ سراب دنیا

  بٹ گئی
(کلام/ممتازملک ۔ پیرس)

رونا ہے احترام کا سچ تو ہے یہ مگر

عزت بڑوں کی آج مکانوں میں بٹ گئی

بیٹی سبھی کی سانجھی ہوا کرتی تھی کبھی

غیرت گلی کی ساری دکانوں میں بٹ گئی

جس کا کبھی جوانوں میں چرچا تھاہاں وہی

مردانگی بھی آج زنانوں میں بٹ گئی

قیمت بٹورے عقل کے والی چلے گئے

بےچینیوں کی بھینٹ دیوانوں میں بٹ گئی

 قربانیاں غریب کے حصے میں رہ گئیں 

دولت شہر کی ساری سیانوں میں بٹ گئی

ممتاز منصفوں کے نہ احوال پوچھیئے

انصاف کی دلیل بیانوں میں بٹ گئی 

                    ●●●                   

ہم کو بھی مدینے میں بلائیں ۔ نعت/ اے شہہ محترم صلی اللہ علیہ وسلم

                       نعت 

        ہم کو بھی مدینے میں بلائیں 

                (کلام/ممتازملک.پیرس)

ہم آپکے دربار میں کچھ نعتیں سنائیں  

سرکارجی ہم کو بھی مدینے میں بلائیں 

باندھے ہوئے بیٹھے ہیں دل زار کا ساماں

مل جائے اگر اذن تو حاضر ہوں غلاماں

ہم جیسے مسافر کو بھی منزل پہ لیجائیں 

سرکار جی ہم کو بھی مدینے میں بلائیں 

بن ویزا ملاقات کا دستور نہیں ہے 

لیکن یہ جدائی ہمیں منظور نہیں ہے 

ہوتی ہے کبھی جیب بھی خالی کیا بتائیں

سرکار جی ہم کو بھی مدینے میں بلائیں 

گھر بار کی فکریں ہمیں ہلنے نہیں دیتیں 

رشتوں کی حقیقت بھی سنبھلنے نہیں دیتیں 

اولادوں کو سنت بھرا پروان چڑہائیں 

سرکار جی ہم کو بھی مدینے میں بلائیں


اس بزم میں بیٹھے ہوئے ہر فرد کی سن لیں
اور بانی محفل کی دعاوں کوبھی سن لیں
ممتاز کبھی سامنے آ کر بھی سنائیں
سرکارجی ہم کو بھی مدینے میں بلائیں 

                       ۔۔۔۔۔۔۔

رزق اور بھوک/چھوٹی چھوٹی باتیں

رزق اور بھوک

کسی کے پاس رزق نہیں اور کسی کے پاس بھوک تیری ۔۔۔

تیری حکمتیں ہیں یارب

(چھوٹی چھوٹی باتیں)

(ممتازملک.پیرس)

منافقوں کا ہجوم/ چھوٹی چھوٹی باتیں

منافقوں کا ہجوم

منافقوں کے ہجوم سے سچ کی تنہائی ہزار درجہ بہتر ہے ۔

(چھوٹی چھوٹی باتیں)

(ممتازملک۔پیرس)

اسمبلیوں میں فیشن پریڈ ۔ کالم

   اسمبلیوں میں فیشن پریڈ 
                       (تحریر:ممتازملک.پیرس)

اسمبلی کی کاروائی کی جھلکیاں دیکھتے ہوئے بار بار یہ خیال پریشان کرتا ہے کہ

خواتین اراکین اسمبلیاں کی تیاریاں

قیمتی سے قیمتی ملبوسات ، برانڈڈ گاگلز ،  لاکھوں کے دستی بیگز اٹھائے کروڑوں کی گاڑیوں میں ملازمین  کے جھرمٹ میں چلتی ہوئی یہ خواتین کس لحاظ سے پسے ہوئے عوام اور طبقات کی نمائندہ تسلیم کی جا سکتی ہیں ؟ 

 انکی فیشن پریڈ دیکھ کر کون کہہ سکتا ہے کہ یہ ایک غریب ملک کی اسمبلیوں میں بھوکے فقرے لوگوں کا ووٹ لیکر آئی ہیں یا نامعلوم پردوں میں کسی کے سر پر سوار ہو کر نام نہاد عوام کی نمائندگی کرنے آئی ہیں ۔ ہو سکے تو پڑوسی ملک بھارت کی اس بات سے سیکھیئے جہاں بڑی سے بڑے ہیروئن بھی اگر اسمبلی میں منتخب ہو کر پہنچے تو اس نے بھی سستی ترین ساڑھیاں اور قمیض شلوار کا انتخاب کیا ۔ جہاں انہیں عورت ہوتے ہوئے  اندراگاندھی یہ سمجھا کر گئی کہ اسمبلی میں جن لوگوں کے ووٹ سے آئے ہو ان کی نمائندگی تمہارے حلیئے اور لباس سے بھی ظاہر ہونی چاہیئے ۔ تاکہ وہ تمہیں اپنے جیسا اور اپنے مسائل و خواہشات سے آگاہ تصور کریں ۔  سو وہ سستے ترین اور سادہ ترین ملبوسات میں اسمبلی میں اور عوامی مقامات پر نظر  آتی ہیں ۔ جبکہ ہماری اسمبلی یا سینٹ میں آتی خواتین کو دیکھ کر لگتا ہے یا تو یہ رشتہ لینے جا رہی ہیں یا پھر اپنا رشتہ دینے جا رہی ہیں ۔ اندر عوامی مسائل پر بحث نہیں  ہونے  جارہی بلکہ کسی فیشن شو میں انکی ماڈلنگ کا انتظام کیا گیا ہے ۔ یا اپنی امارت اور بناو سنگھار سے دوسرے کو پچھاڑنے کی تیاری ہے ۔ یا پھر معذرت کیساتھ وہاں پر مردوں کو رجھانے کا کوئی  مقابلہ ہونے جا رہا یے ۔ 

کس قدر شرم کی بات ہے کہ جس ملک میں لوگ دو وقت کی روٹی کے محتاج ہو گئے اور اسمبلیوں میں یہ نمائندہ خواتین ایسٹ انڈیا کی میموں کی منظر کشی کر رہی ہیں ۔ 

یہ کون سے ملک سے آتی ہیں اور یہ کیا کر رہی ہیں پاکستان میں  ؟ ان کے حلیئے اور انداز نزاکت سے تو ہمیں یہ محسوس ہوتا یے جیسے ابھی تالی بجا بجا کر حکم دینگی کہ اسے مار ڈالو ،اسے اٹھا لو ، چلو ہمارے جوتے صاف کرو ، چلو ہمیں پنکھا جھلو ۔۔۔

جن خواتین کو دیکھ کر آپ کو ایسی باتیں محسوس ہوتی ہوں ان سے کسی بھی بات کی ہمدردی کی اور انسانیت کی کسی خدمت کی توقع کیسے رکھی جا سکتی ہے ۔ 

پراٹھے کھانے والے کو کیا معلوم بھوک سے انتڑیوں میں بل کیسا ہوتا ہے ؟ 

بطور پاکستانی عام انسان کے ہم سب چاہتے ہیں کہ ہمارے ملک میں ہر ایک کو انصاف ملے، تحفظ ملے ، خاص طور پر عورتوں اور بچوں کے خلاف ہونے والے جرائم کا خاتمہ  ہو سکے ۔ اسی لیئے اسمبلی میں خواتین کی نمائندگی بھیجی جاتی ہے کہ جو مسائل ہمارے بھائی ، مرد حضرات نہیں سمجھ سکتے وہ یہ خواتین سمجھیں گی اور اس پر بہتر انداز میں آواز اٹھا سکیں گی ۔ اور اس پر زیادہ بہتر قانون سازی کروا سکیں گی  اور ان پر عملدرآمد ہو سکے گا ۔ لیکن افسوس ہر گزرتے دن کیساتھ  خواتین اراکین اسمبلیان کی جن  کارکردگیوں میں دن دونی اور رات چوگنی اضافہ ہوا ہے وہ ہے کرپشن ، اقربا پروری ، تکبر ،  میک اپ ، فیشن ۔۔۔

کارکردگی ان کی صفر سے بھی نیچے کوئی ہندسہ ہوتا تو وہی قرار پاتی ۔ 

جوں جوں اسمبلیوں میں فیشن کی ماری خواتین کا اضافہ ہوتا گیا توں توں ملک میں عورتوں اور بچوں کے خلاف بھیانک جرائم کہ تعداد بھی ہوشربا ہوتی چلی گئی ۔ انہیں کون بتائے گا کہ ان کا اسمبلی میں پہنچنے یا پہنچانے کا کیا مقصد ہے ۔ خدارا یوں تو سارے ملک  میں خواتین کی بے لگام بے پردگی پر لگام ڈالیئے ۔ اور ملک بھر میں خواتین  کو عموما اور اسمبلیوں میں خصوصا ایک ڈھیلا ڈھالا لبادہ جیسے جبہ یا گاون اور سر پر کوئی رومال یا سادہ دوپٹہ لیکر آنے کا پابند کیا جائے ۔ وہ اپنے گھر میں کیا پہنتی ہیں اور کیا نہیں،  یہ ان کا ذاتی معاملہ ہے کیونکہ یہ کسی پر اثر انداز نہیں ہوتا ۔ لیکن جہاں یہ معاملہ کسی پر اثر انداز ہونے لگے وہاں اس پر دھیان دینا بیحد ضروری ہے کیونکہ خواتین کے پہناوے اور بناو سنگھار سے ہی کسی ملک کی اقدار  اور شرافت کا اندازہ لگایا جاتا ہے ۔ دنیا کے کسی بھی ملک میں خواتین اراکین اسمبلیاں  شادی بیاہ کے اور ماڈلز کے ملبوسات زیب تن کر کے پیش نہیں ہوتی ہیں اور نہ ہی عوامی مقامات اور دفاتر میں نظر آتی ہیں ۔ ہر لباس اور ہر بناو سنگھار کا اپنا اپنا موقع اظہار ہوتا ہے ۔ وہ وہیں پر اچھے لگتے ہیں ۔ کہیں اور اسے برتیں گے تو صرف مذاق ہی کا نشانہ بنیں گے۔ اس لیئے تمام سیاسی خواتین سے خصوصی گزارش ہے کہ اپنے حلیئے اور میک اپ میں سے چھچھورپنے کی نفی کیجیئے ۔ باوقار انداز میں اپنے کام کے مقامات پر پہنچیئے تاکہ دیکھے والے مرد بھی آپ کی عزت کرنے پر مجبور ہوں ۔ اپنے آپ کو لال پیلی چھمک چھلو بنا کر تماشا مت بنائیں ۔ یہ  آپ کا ذاتی معاملہ ہر گز نہیں ہے آپ ہماری نمائندگی کرتی ہیں اس لیئے  یہ ہمارے مجموعی قومی وقار کا سوال ہے ۔ اگر آپ ایسا نہیں کر سکتیں تو جا کر اپنے گھر بیٹھیئے یا فلموں میں اپنے نازوانداز کی نمائش کیجیئے ۔ 

                          ●●●

اذیت میں لذت؟ کالم

          اذیت میں لذت ؟

                       (ممتازملک۔پیرس)

مجھے یاد یے جب ہم خط لکھا کرتے تھے اور اس کے جانے میں مہینہ بھر لگ جایا کرتا تھا ، پھر فوری جواب بھی بھیجا جاتا تو تب بھی ایک مہینہ اور لگ جاتا ۔ اور دو  ڈھائی ماہ بعد کہیں اپنی کہی بات پر دوسرے کا جواب ان ترسی ہوئی منتظر آنکھوں کو ملا کرتا تو دل بڑی شدت سےخواہش کیا کرتا تھا کہ کاش کوئی ایسا طریقہ ہو کہ نام لو اور اس کی آواز سن لو ، سوال کا فورا جواب پالو ، دیکھنا چاہا تو پلک چھپکتے میں دوسرے کا دیدار کر لیا جائے ۔۔۔

فون کال بھی باقاعدہ بک کروائی جاتی تھی مجھے یاد یے 96ء میں 96 روپے فی منٹ کی کال فرانس کے لیئے تو میں بھی اپنے شوہر کے لیئے  بک کروایا کرتی یا گورنمنٹ پی سی او پر کافی انتظار کے بعد میں جلدی جلدی اپنی بات پہلے سننے کا کہتی کہ جس کام کے لیئے فون کیا ہے وہ بھول نہ جائے اور پیسے ختم نہ ہو جائیں ۔۔

اف خدایا کیا ترسا ہوا دور تھا وہ ، اور پھر خدا نے ہماری خواہش پوری کر دی ۔ ہماری دعائیں رنگ لے آئیں اور ہمیں انٹر نیٹ مل گیا موبائل مل گیا ، واٹس اپ نے تو گویا ہر مراد ہی پوری کر دی ،

اور آج ہم جیسے ماضی پرست بیٹھے ہق ہائے کا نعرہ لگا کر اپنی طرف سے بڑی رومانوی یاد کے طور پر اس لمحہ لمحہ سسکتے دور کو یاد کرتے اور آہیں بھرتے ہیں کہ ہائے ہائے کیا دور تھا وہ خطوں کا لکھنا اور وہ جواب کے انتظار کی لذت۔۔۔۔ہائیں لذت؟؟؟ ارے بھائی یہ عذاب ناک انتظار اور اس کی تڑپ اور بیقراری لذت کب سے ہو گئی ۔ اور جس کے لیئے یہ لذت یے وہ یقینا کوئی ذہنی طور ہر ہلا ہوا ہی ہو سکتا ہے ۔ 

اللہ تعالی نے ہمیں ہر روز گزرے کل سے زیادہ آسانیاں عطا فرمائیں ہیں ۔ آسائشیں عطا فرمائیں ہیں ۔ اسے اپنی ناشکریوں کی نظر مت کیجیئے ۔ آج کے وقت میں شکرگزاری کیساتھ جینا سیکھیئے ۔

بھوکے ننگے ، ترسے ہوئے، تکلیفدہ زمانوں کو یاد کر کے اپنی آج کی خوشیوں پر پانی مت پھیریئے۔ آج کی آسانیوں اور آسائشوں کے بنا گزرے وقت کی تکلیفوں کو سچائی کیساتھ محسوس کر کے یاد کریں گے تو آپ کو آج کے دور کی آسانیاں قدر کی نگاہ سے دکھائی دینگی ۔

بلکہ یہ سوچ کر تو شکر گزاری اور بھی بڑھ جانی چاہیئے کہ اگر اس وقت یہ سہولت ہوتی جب ہمارے وہ پیارے  اس دنیا میں موجود تھے (جن سے ہم نے دوریوں کے عذاب سہے) تو کتنا اچھا ہوتا ۔ کہتے تھے کہ خط آدھی ملاقات ہوتی ہے تو اب سماعت اور سماعت سے بڑھ کر بصارت یعنی آڈیو اور ویڈیو نے تو سمجھیئے ہماری دوریوں کا تصور ہی مٹا کر رکھ دیا ہے ۔ اٹھانوے فیصد ملاقات نے فاصلوں کو سمیٹ کر رکھ دیا ہے ۔  دو فیصد کسر رہ گئی ہے تو سامنے والے کو چھونے کی یا کسی چیز کو سونگھنے کی ، تو کیا بعید کہ بہت جلد چھونے اور سونگھنے کا عمل بھی اس میں شامل کر دیا جائے ۔  

آج سے پچاس سال  سے پرانے کسی بھی شخص کو اچانک آج کے وقت میں لے آئیں تو یقینا یہ وقت اور آج کی دنیا اس کے ہوش اڑانے والی جادو نگری  سے کم نہیں ہو گی ۔ بلکہ کئی آج کے دور میں موجود لوگوں کے لیئے بھی آج ہی دنیا کسی جادو نگری سے کم ہر گز نہیں ہے ۔ کچھ تو وہ ہیں جس کے وسائل یا پہنچ ان نئی ایجادات یا سہولیات تک نہیں ہے لیکن کئی ایسے بھی ہیں جن  کے پاس وسائل کی کمی ہے نہ ہی تعلیم کی ، ان چیزوں تک ان کی رسائی کوئی مسئلہ ہے نہ ہی حصول لیکن اس کے باوجود آج بھی ایسے لوگ نت نئی ایجادات خرید تو لیتے ہیں صرف دوسرے کے سامنے اس کی نمائش اور اپنی بڑائی دکھانے کے لیئے لیکن وہ اس چیز کے استعمال کرنے کے طریقے بالکل بھی نہیں جانتے ۔ اس سے وہ اس وقت کی ان ایجادات کے فوائد سے محروم ہی رہتے ہیں ۔ سو جب بھی کوئی جدید تیکنیکی  چیز  خریدیں تو تھوڑا تھوڑا وقت نکال کر پہلے یا بعد از خرید اس آلے کے استعمال کو ضرور جانیئے۔ کچھ سیکھنے یا جاننے میں کبھی بھی شرمائیے مت ۔ کیونکہ شرمانے والا خود کو ان فوائد اور معلومات سے محروم کر رہا ہوتا ہے ۔ 

گزرے زمانے کی محرومیوں پر ٹھنڈی آہیں بھرنے کے بجائے آج کے موجودہ لمحے کی سہولتوں پر مسکرا کر شکرگزار ہونا ہی خوبی ہے ۔

                       ۔۔۔۔۔۔۔

چوھدری

میری ذاتی رائے ہے کہ یہ اصل لفظ کبھی جوتھری  رہا ہو گا جو بگڑتے بگڑتے چوھدری ہو گیا ۔
ذرا غور کیجیئے زمیندار جو زمیں جوتنے کے لیئے جسے دیا کرتے تھے اسے جوت + ری =  جوتری
جوتنا+ کرنا +آواز میں ذور ڈالنے کے لیئے ھ ڈال دیا تو بن گیا =جوتھری
لیں غلط العام ہوتے ہوئے یہ چوھدری ہو گیا جو شاید آغاز میں بطور گالی کے کسی کو طنزا کہا گیا ہو ۔
لغت ممتازیہ

حاضر جوابی نہیں بھانڈ پن ۔ کالم

   حاضرجوابی نہیں بھانڈپن
                         (تحریر:ممتازملک۔پیرس)

یہ سچ ہے کہ  ہمارے ہاں قومی مزاج میں بھانڈ پنا سرایت کر چکا ہے ۔ ہمیں معلوم ہی نہیں کہ مذاق اور تذلیل میں کب حد فاضل قائم کرنا ہوتی ہے ۔

ہمیں معلوم ہی نہیں کہ مذاق کس سے کیا جا سکتا یے اور کس سے نہیں ۔  

کچھ روز قبل ایک ٹریولر پیج ہر کسی صاحب نے پوچھا کہ کم سے کم خرچ میں وہ کہیں جانا چاہیں تو کہاں کہاں جا سکتے ہیں ؟ اگر یہ سادہ سا سوال دنیا کی کسی بھی مہذب قوم کے کسی پیج پر ہوتا ہے تو وہاں وہ جواب میں اسے کومنٹ بکس میں ہی ایسے تمام مقامات کی تفصیلات اور اخراجات کا حوالہ فراہم کرتا ۔ یا اسے ان بکس میں اس کا جواب دیکھنے کی ہدایت کرتا ۔ لیکن اس سادہ سے سوال کے جواب میں ہمارے بڑے سے بڑے نام نہاد  تعلیم  یافتہ سے لیکر عام سے پرائمری پاس نے بھی خوب مسخرہ پن دکھانے کی کوشش کی ۔ کسی نے اسے تانگے پر جانے کا مشورہ دیا ، تو کسی نے اسے محلے کی سیر تجویز کی ۔ کسی نے اسے بسوں میں ریوڑیاں، ٹافیاں ، منجن بیچتے بیچتے پہنچنے کا مشورہ دیا تو کسی نے اپنی اوقات کے مطابق کوئی اور فضول ترین بات کی ۔ جسے پڑھ کر ہر ذی شعور انسان کو سخت افسوس بھی ہوا اور شرمندگی بھی ۔ ان سارے کومنٹس میں کسی کی ڈگری تھی یا وہ پرائمری پاس تھا سب کے سب کا ذہنی معیار ایک سا ہی نظر آیا ۔ 

غور کرنے کی بات یہ ہے کہ سوال اس پیج کے ایڈمن سے معلومات کے حصول کے لیئے کیا گیا ہے تو باقی اراکین کو اس میں اپنا زہنی پٹارہ کھولنے کی کیا ضرورت ہے ؟ 

کیا جسے آپ اپنے ذہنی معیار کے گھٹیا مذاق سے نواز رہے ہیں آپ اسے ذاتی طور پر جانتے ہیں ؟

اگر جانتے بھی ہیں یا وہ آپ کا قریبی بے تکلف ترین دوست بھی ہے تو کیا آپ اس کی مالی حیثیت کا مذاق یوں عوامی سطح پر اڑا کر اپنی دوستی کا کوئی حق ادا کر رہے ہیں ؟

یا پھر وہ آپ سے کئی لحاظ میں ہزار گنا بہتر ہے اور آپ اسے ان گھٹیا جوابات کے ذریعہ کمتر ثابت کر کے اپنی چھوٹے ذہن کی چھوٹی اور گھٹیا سوچ کو کوئی تسکین پہنچانا چاہتے ہیں ۔ 

اور پھر ایک سیدھی سے بات ایک پبلک پلیٹ فارم پر اگر آپ کا اپنا کوئی قریبی اور بے تکلف دوست بھی پوچھ رہا ہے تو اس کا پوری سنجیدگی اور سمجھداری سے جواب دیجیئے ۔ ہمیں یہ یاد ہی نہیں رہتا کہ ہر انسان کی جیب ایک جتنی نہیں ہوتی لیکن دل تو ایک جیسے ہی ہوتے ہیں ۔

میں نے اور مجھ جیسے اربوں لوگ ہمیشہ یہ جاننا چاہتے ہیں کہ کب کہاں کم قیمت پر کوئی اچھی چیز یا پیکج مل سکتا ہے تو ہم اس سے فائدہ اٹھا سکیں ۔ تو اس میں شرم کی کیا بات ہے ۔ بچت کرنا اور اپنی جیب کے مطابق رہ رہنمائی لیکر  کوئی کام کرنا بہت سمجھداری کی بات ہے ۔ ناکہ جیب میں چونی بھی اپنی کمائی کی نہ ہو اور ہم باپ اور بھائی کی مال پر جا کر لوگوں میں "پھڑیں" مارتے پھریں ور نوٹوں کو آگ لگا کر خود کو مال دار ثابت کرنے کی واہیات حرکتیں کرتے رہیں ۔ پہلے اپنی محنت سے چار پیسے کما کر دیکھیئے تاکہ آپ کو معلوم ہو کہ  اسے خرچ کرنے میں کتنی تکلیف ہوتی ہے ۔ 

 ہم لوگ اس فرق سے بالکل ہی نابلد ہو چکے ہیں کہ مذاق کیا ہوتا ہے اور جگت کیا ہوتی ہے اور حاضر جوابی کسے کہتے ہیں ۔ حاضر جوابی ایک بہت بڑی خوبی ہوتی ہے جبکہ بات سمجھ میں آئے نہ آئے منہ کھول کر کوئی بھی بات سامنے والے پر پھینک دینا بدتمیزی ، منہ پھٹ ہونا اور بدزبانی تو ہو سکتا ہے حاضر جوابی نہیں ۔ حاضر جوابی کا مطلب ہے کہ آپ کے سامنے کوئی بھی بات ہو تو آپ کا ذہن اس قدر متوجہ اور قابل ہو کہ اس بات سے متعلق درست جواب یا رائے فوری طور پر سامنے پیش کر سکیں ۔ جبکہ اوپر دیئے گئے جوابات حاضر جوابی تو کسی بھی لحاظ سے نہیں کہلا سکتے ۔ ہاں بیہودگی ، بداخلاقی ، بدتمیزی اور تکبر کے پہلے پائیدان پر ضرور موجود ہوں گی ۔ کیا آپ کو اندازہ ہے کہ ان جوابات سے پوچھنے والے کو کس قدر شرمندگی اور دکھ ہوا ہو گا ۔ اور ہم نے اپنی نیکیوں میں کون سا اضافہ کر لیا، ہاں البتہ گناہوں کے بورے بھر بھر کر اپنے کندھوں پر ضرور باندھ لیئے ۔ 

یاد رکھیئے ہمارے الفاظ ہمارے منہ میں اسی طرح سے بھرے ہوئے ہیں جس طرح پستول میں گولیاں بھری ہوتی ہیں ۔ اور اس پستول کا استعمال اتنا تکلیف دہ نہ بھی ہو کہ اس کا زخم تو بھر ہی جائے گا یا زخمی ایک ہی بار میں  مر جائے گا ، لیکن منہ سے نکلی گولی روح تک کو چھیدنے کے لیئے کافی ہوتی ہے ۔ 

کاش ہم زبان چلانے سے پہلے دماغ چلا لیا کریں تو یوں کسی کی دلآزاری کا گناہ ہمارے اچھے  اعمال کے تھیلوں میں سوراخ نہ کرتا ۔

                     ------

سمجھ جائے

کاش ایسا بھی کوئی وقت آئے
میں کہوں اور تو سمجھ جائے
زندگی زلف میری بن جائے
انگلیوں  سے تیری سلجھ جائے
            (کلام/ممتازملک ۔پیرس)

● تو کون میں کون ۔ کالم

              تو کون میں کون
               (تحریر:ممتازملک۔پیرس)

دیکھو مٹی میں نہیں کھیلنا ، اسے منہ نہیں لگانا ، یہ ہمارے سٹیٹس کا نہیں ہے ، وہ ہمارے سٹینڈرڈ کا نہیں ہے ، دوسرے کو  اگنور کرنا، سیکھو،
اپنے لیول کے لوگوں سے تعلقات بڑھایا کرو، یہ چھوٹے لوگ ہیں ، بڑے لوگوں میں پی آر او بناو،
جی ہاں یہ ہی ہے ہمارے آج کی آدھی تیتر اور آدھی بٹیر ماوں کی اپنے بچوں کو دی ہوئی تربیت ۔

اور آج ہمارے معاشرے میں انسانیت کی جو تذلیل ہے ، خود غرضی کا جو طوفان ہے ،

یہ سب کچھ ہماری ماوں کی ناکام تربیت کا ہی منہ بولتا ثبوت ہے ۔ ماہرین نفسیات اس بات پر متفق ہیں کہ بچے کی تربیت اس کے پہلے پانچ سال میں ہی مکمل ہو جاتی ہے ۔
 آج جب مائیں اپنے پانچ سال تک کی عمر کے بچوں کو دینی اور اخلاقی سبق اور تربیت نہیں دے سکتیں تو انہوں نے حیوان ہی بننا ہے انسان نہیں ۔ جو آج ہمارے معاشرے میں دندناتے نظر آ رہے ہیں ۔  آج ہمارا بچہ ان پانچ سالوں میں نادان ماوں اور حکومتی سسٹم کی بھینٹ چڑھ کر بابا بلیک شیپ اور ٹوئنکل ٹوئنکل لٹل سٹار کے رٹتے رٹتے  ہی میں وہ سنہرا ترین وقت گنوا بیٹھتا ہے ۔ دنیا میں کسی ملک کے بچے پر یہ لسانی ظلم نہیں ہوتا جو ہمارے ہاں  بچوں کو سہنا پڑتا ہے۔
پہلے مشترکہ خاندانی نظام کی وجہ سے بچہ کسی نہ کسی کی نظر میں رہتا تھا تو اسے سکھانا سمجھانا بھی کئی لوگوں کی ذمہ داری میں آ جاتا تھا ۔ گو کہ وہاں بھی کسی کے لاڈلے بننے اور کسی کو نشانے پر رکھ لینے والی ناانصافیوں کے سبب مشترکہ خاندانی نظام کا بھٹہ ہی بیٹھ گیا ۔ کیونکہ وہاں بھی ناانصافیوں کے سبب اور شریف النفس انسان کو قربانی کا دنبہ بنا لینے کی عادتوں کے طفیل اسی کے بچے سب سے زیادہ محرومیوں کا شکار کر دیئے جاتے تھے ۔ اس لیئے اپنے خاندان یعنی اپنے بیوی بچوں کی ذمہ داری ہر انسان کو خود ہی اپنے سر لینے کا فیصلہ کرنا پڑا ۔ جس کے سبب آج جب علیحدہ خاندان (سیپرٹ فیملی) کا رواج ہے ۔ اور مہنگائی اور نت نئی ایجادات کے سبب بچے پالنا ہاتھی پالنے کے برابر ہو چکا ہے ، تو عافیت اسی میں ہے کہ یہ ہاتھی جتنے کم ہوں اتنا ہی بہتر ہے یعنی کہ  بچوں کی تعداد کم ہی رکھیں تو ہی عافیت ہو سکتی ہے ، اور ہر بچے میں کم از کم 3 سال کا وقفہ ہی ہمیں ان کی تربیت کا بہترین وقت فراہم کر سکتا ہے ۔ ماں اور باپ دونوں بچے کے سامنے فساد اور طعنے تشنع سے بچیں ۔ گھر میں عورت کو گالم گلوچ اور مارپیٹ بچے کو یہ ہی کچھ کرنے پر اکساتی ہے ۔

اگر باپ ہی اپنے گھر میں اپنے ہی گھر کی عورت کی اور خصوصا اپنی بیوی اور اپنے بچے کی ماں کی ہی عزت اور حفاظت نہیں کریگا تو اس کی اولاد یہ عزت کا سبق کہاں سے جا کر سیکھے گی ؟
 ماں گھر میں اور باپ باہر کے لیئے بچے کو تیار کرتا یے  ۔ جیسے بیٹا کسی سے بدتمیزی نہیں کرنی ۔ بلا ضرورت  اونچی آواز میں بات کرنا بد تہذیبی ہے ، گالی نہیں دینی ۔ لڑنا بری بات ہے ۔ سلام میں پہل کرو ۔ کسی سے کچھ لیکر نہیں کھانا ۔ ٹوہ میں رہنا بری بات یے ، کسی کے بھی گھر یا کمرے میں دستک دیئے بنا اور اجازت لیئے بنا داخل ہونا بری بات ہے ، دروازے پر دستک دیکر دروازے کے اس رخ پر کھڑے ہو جس پر دروازہ کھلنے کی صورت میں فورا تمہاری نظر اس گھر کے اندر نہ جائے ، شریفانہ اور پسندیدہ عمل ہے ،
فضول باتوں سے کسی کا وقت برباد مت کرو، جو بات کرنی ہو پہلے اس کا مضمون اپنے ذہن میں بنا کر رکھو تاکہ کم وقت میں واضح بات سامنے والے سے کی جا سکے ۔
 بغیر اجازت کسی کی کوئی چیز نہ اٹھانا، نہ استعمال کرنا ۔ کسی کو راستہ دینا ، ہاتھ سے چھو کر مذاق مت کرنا ، کلاس میں ایکدوسرے کی اچھی بات اور کام میں  مدد کرنا، اپنے ساتھ نماز اور دیگر محافل میں لیکر جانا ، انہیں محفل کے آداب سکھانا ، کھانا کھانے کے آداب سکھانا ، کوئی لباس پہن کر اسے کیسے لیکر چلنا ہے ،  ۔۔۔ایسی بہت سے باتیں۔

جبکہ دوسری جانب ایسی ماوں اور ان کے ہاتھوں پروان چڑھے لوگوں کی بھی کمی نہیں یے جو مذہبی حلیئے اور عبادت پر تکبر اور اپنے اوپر  جنت کی واجبیت کے یقین پر ساری دنیا کو اپنے سامنے ہیچ سمجھتے ہیں اور  وہ اسے ساری دنیا پر اپنا احسان گردانتے ہیں ۔ اپنی نمازوں روزوں اور حج و عمرہ کو اپنے معاشرے پر مہر بانی سمجھتے ہیں ۔ جبکہ سمجھنے کی ضرورت یہ ہے کہ کس بات کا فائدہ صرف ہمارا ہے اور کس بات سے ہم اپنے معاشرے کو اپنے مفید ہونے کا احساس دلاتے ہیں ۔ 

ہم لوگوں کو  یہ بات پہلے نمبر پر رکھنی ہو گی کہ بھائی میری نماز ، روزہ ، مذہب خالصتا میرا اور میرے خدا کا معاملہ ہے اس سے سامنے والے کا کوئی حاصل وصول نہیں ہے ۔ مجھے حقوق العباد  (لوگوں کی حقوق) پر اپنے اعمال درست کرنے ہیں کیوں کہ اس پر میری دنیا کا بھی انحصار ہے اور آخرت کی بخشش کا بھی ۔ میں نے کتنی نمازیں پڑھیں، کتنے روزے رکھے، سے زیادہ اس بات پر بخشش کا انحصار ہو گا کہ ہم نے اپنے والدین ، بہن بھائیوں، شوہر ، بیوی، پڑوسیوں کے حقوق ادا کیئے ۔ کسی یتیم کے سر پر ہاتھ رکھا ۔ کسی بیوہ کو اسے کے پیروں پر کھڑا کیا ، کسی کا جھگڑا ختم کرایا  ۔۔۔اور ایسے ہی کام اصل میں ہمارے اعمال ہیں ۔
جن کا نہ صرف پورے معاشرے پر اثر پڑتا ہے بلکہ اللہ پاک نے اس کی بابت ہم پر بھاری ذمہ داریاں عائد کر رکھی ہیں ۔ بات کرتے ہیں تو ہم ایک دوسرے کو کاٹ کھانے کو دوڑتے ہیں ۔ کاروباری معاملات ہوں تو صبر تحمل اور برداشت کا نام و نشان نہیں ہے ۔ محلے داری اور پاس پڑوس کا معاملہ ہو ہم لوگوں میں رواداری اور لحاظ نام کو بھی نہیں رہا ۔ پھر ہم کہتے ہیں کہ زمانہ وہ نہیں رہا ۔ زمانہ تو وہی ہے اپنے گریبان میں جھانکیئے تو آپ کو معلوم ہو گا کہ آپ وہ نہیں رہے ۔ جیسے ہم سے پہلے لوگ ہوا کرتے تھے ۔ آج خود غرضی اس انتہا کو پہنچ چکی ہے کہ بھائی بھائی کو اور بہن بہن کو لوٹنے سے پہلے ایک لمحے کو بھی سوچنا پسند نہیں کرتے ۔ 

ہر ایک کی پہلی سوچ یہ ہی ہوتی ہے کہ موقع غنیمت جانو لوٹ لو ، اٹھا لو فائدہ اور جب کچھ نہ بچے تو آنکھیں ماتھے پر نہیں اب تو پیٹھ پر سجا لو کہ بھائی تو کون میں کون ۔۔
مادہ پرستی اور خود غرضی ہمارے اپنے من چاہے وہ عیوب ہیں جو ہم نے خوشی خوشی اپنے اعصاب پر سوار کیئے ہیں ۔ جب تک ہم انہیں اپنے کندھوں سے نہیں اتاریں گے ہماری منزل کا سفر نہ سہل ہو گا نہ مکمل۔ نہ دنیا میں نہ آخرت میں  ۔۔۔۔۔۔۔
                       ۔۔۔۔۔۔۔۔

اچھی یا بری باتیں ۔ چھوٹی چھوٹی باتیں

اکثر با تیں بری نہیں ہوتیں لیکن ان باتوں میں الفاظ کا چناو انہیں اچھے اور برے کی سند دلوا دیتے ہیں ۔

(چھوٹی چھوٹی باتیں)

(ممتازملک۔پیرس)

اپنے عیب۔ چھوٹی چھوٹی باتیں

دنیا میں اپنے عیب اور دوسرے کی خوبی کا اعتراف سب سے مشکل کام ہوتا ہے ۔ لیکن جو ایسا کر جاتا ہے وہی اچھا انسان ہوتا ہے ۔ 

(چھوٹی چھوٹی باتیں)

(ممتازملک۔پیرس)