@ سمجھاندا اے/ پنجابی کلام ۔ او جھلیا

  

       سمجھاندا اے     

جد یاد کسے وچ رو رو کے، کوئی روندا اے کرلاندا اے

بس خواب ہی ایسی دنیا اے، جتھے بن ویزا مل جاندا اے

ہر اک دا میل دے ویلے تائیں، وکھرا رنگ نکلدا اے

کوئی ہاسے دیکے جاندا اے، کوئی غماں دے وس پاندا اے

کوئی لیکے ناں محبت دا، کتے ون سونے ناٹک نے 

کوئی کاجل چوری کر جاندا، کوئی اکھی سرمہ پاندا اے

ایس دل دے باغ دا کی کہنا، ایتھے انگوراں دی بیلاں تے

 کدی تمبوڑاں دی موج لگی، کتھے سپ ولیٹا پاندا اے

کدی ہتھ گلاباں دی چاہت وچ، زخمی ہو ہو جاندے نے

 ساڈے نازک دل نوں پھل موتیا، جی موہندا تے مہکاندا اے

ہر کم وچ رب دی مرضی اے، ہر شی وچ کوئی حکمت اے

ممتاز ایہو تے رب سوہنا، دے لے کے سانوں سمجھاندا اے

                 ●●●۔