افضل ساحر دی پنجابی شعری کتاب
نال سجن دے رہیئے
تے تبصرہ ممتاز ملک.پیرس
افضل ساحر دی شاعری پڑھن تے اودے گیت سنن دا موقع تے کئی وار ملیا تے دل بیساختہ داد دین تے وی مجبور ہویا پر اس ویلے ہور خوشگوار جئی حیرت ہوئی جد اوہدا تعارف پڑھن دا موقع ملیا ۔
افضل ساحر اک پڑھیا لکھیا تے بڑا ہی فنکار مزاج بندہ لگا ۔ او نہ صرف ریڈیو دی دنیا وچ اپنے کم تے اپنی آواز دے نال اک نویکلی پہچھان رکھدا اے تے دوجے پاسے او ڈرامہ لکھن دے میدان وچ وی اپنی پوری صلاحیت دے نال وکھائی دیندا اے ۔ اودے گیت سنیئے تے لگدا اے دل اودے نال نال اسے کیفیت دا شکار ہوندا جاندا اے جیڑی شاید لکھن ویلے ہر شاعر دی طرح اوس تے وی طاری ہوئے گی ۔
افضل ساحر نے پنجابی شاعری دی ہر صنف وچ طبع آزمائی کیتی اے تے خوب کیتی اے۔
دوہے، غزل ، کافی، گیت جیڑی وی شے پڑھو گے افضل ساحر دی ٹھیٹھ پنجابی زبان دے وچ دسترس دے قائل ہوندے جاو گے ۔
انہاں دے کلام دے وچ پجھارتاں دی صورت، تے کدی بولیاں دی صورت سچ دا شیشہ ویکھن دا خوب موقع ملدا اے۔
جیویں کہ ملاحظہ کرو۔۔۔
ہر دو لعن سیاستاں ، میں ای میں پردھان
آپو وچ لڑائیکے ، کوڑ پنچیتاں لاڑں
۔۔۔۔
جگ کوڑھ پسارا زہر دا
سانوں چسکا لگا زہر دا
دل پارا کتے نہ ٹہردا
سانوں دھڑکو اٹھے پہر دا
اک پاسا مریا شہر دا
وچ پکھا پھینئر لہردا
۔۔۔۔
اینہاں کلاماں اندر افضل ساحر دی اندر تے باہر دی دنیا تے رکھی ہوئی نظر تے سمجھن دی صلاحیت تے قدرت صاف دسدی اے۔
میری نظر وچ افضل ساحر دی کتاب "نال سجن دے رہیئے"
اج دے زمانے وچ (جد پنجابی اپنے اصل رنگ توں کافی دور ہو چکی اے) ٹھیٹھ پنجابی دی ایک بہترین مثال اے ۔
میں دلوں دعا گو آں کہ افضل ساحر کامبیابیاں دیاں پوڑیاں چڑھدا جائے تے دوناں جہاناں وچ عزت تے نام کمائے۔ آمین
ممتازملک۔پیرس
2 فروری 2021ء
●●●
کوئی تبصرے نہیں:
ایک تبصرہ شائع کریں