جی نہیں کردا
کلام: (ممتازملک ۔پیرس)
اپنے دیس نوں جان تے میرا جی نہیں کردا
اوناں نوں ہن دان تے میرا جی نہیں کردا
میرے ہمجولی تے سارے شہر ہی چھڈ گئے
باج انہاں دے رکھ وی پینگاں والے وڈ گئے
ہن اوتھے پہچاندا مینوں کوئی وی نہیں
جائیے کیڑے مان تے میرا جی نہیں کردا
اپنے دیس نوں جان تے میرا جی نہیں کردا ۔۔۔۔۔
اوچے اوچے گھر نیں گلیاں لک گئیاں نیں
کھلے ویڑے سکڑے ندیاں سک گیئاں نیں
رب جانے کہ کون گوانڈی کس دا ہوئے
ہن بوہے کھڑکان تے میرا جی نہیں کردا
اپنے دیس نوں جان تے میرا جی نہیں کردا ۔۔۔۔
جھڑکیاں دیکے فیر وی سینے لا لیندے سی
ماپیاں دی ماراں کولوں وی بچا لیندے سی
پیڑھی اتے بیٹھے استانی جی ٹڑ گئے
ہن تے سبق سنان نوں میرا جی کردا
اپنے دیس نوں جان تے میرا جی نہیں کردا ۔۔۔۔۔
تیرا سی اعتبار دا رشتہ میرے نال
توڑ دتا اعتبار تو وکھری کر لئی تال
بے بھروسہ جند اے لنگی جاندی نہیں تے
ہن تیرا اکھوان تے میرا جی نہیں کردا
اپنے دیس نوں جان تے میرا جی نہیں ۔۔۔۔۔
۔۔۔۔۔
جھوٹ فریب تے مکر اثاثہ بن گیا اوتھے
جیڑا لبھے لٹو خلاصہ بن گیا اوتھے
نکے وڈے دی تفریق نہ لحاظ اکھاں وچ
ڈنگراں نوں سمجھان تے میرا جی نہیں کردا
اپنے دیس نوں جان تے میرا جی نہیں ۔۔۔۔۔۔
۔۔۔۔۔۔۔
ویکھ کے کوئی کہندا سی جد ماشاءاللہ
لمبی ہوئے حیاتی خیری ان شاء اللہ
حاسد دسدے ہر پاسے ممتاز کی کریئے
چنگے کپڑے پان تے میرا جی نہیں کردا
اپنے دیس نوں جان تے میرا جی نہیں کردا ۔۔۔۔۔
●●●
کوئی تبصرے نہیں:
ایک تبصرہ شائع کریں