بھار بنا کے
کلام:
(ممتازملک ۔پیرس)
ہاسے دی گل رکھ لیندے نے دل دے اتے بھار بنا کے
میری جے کر سننی نہیں سی کی فیدہ وچکار بٹھا کے
جس گل پئے گا اوہو جانے جس تن لگے اوہو سیکے
پھاہ نوں سوہنا ناں دتا اے پھلاں دا اک ہار بنا کے
سدھے سادے شرفا دی گل بن گئی کیکھڑ بدبختاں دا
اج کل لوکی جت جاندے نے جیب اپنی تلوار بنا کے
عمراں لگیاں عزتاں دے نال جد تک پردے کلے کول سی
شملے نیویں کرنے پے گئے شریکیاں نوں غمخوار بنا کے
جو کچھ لبھے شاکر ہو جا نہ لبھے تے صاہر ہووو
کی ملنا اے نااہلاں نال امیداں بیکار لگا کے
چل ممتاز تماشا مکیا شاماں پہلے گھر نوں پہنچو
کھڈے تھاں تھاں راہی پے گئے بے فیضے دلدار بنا کے
●●●
کوئی تبصرے نہیں:
ایک تبصرہ شائع کریں