سلام جیسنڈا آرڈرن ۔ کالم

        سلام جیسنڈا آرڈرن
                   (تحریر/ممتازملک.پیرس)

 15 مارچ 2019ء بروز جمتہ المبارک نیوزی لینڈ کی سرزمین کا ایک سیاہ ترین  دن جب عبادت میں مصروف 60 سے زیادہ پرامن اور معصوم مسلمانوں کو کرائسٹ چرچ نامی شہر کی دو مساجد النور اور لن وڈ میں بیدردی سے نشانہ بنا کر شہید کر دیا گیا ۔ ایک آسٹریلوی عیسائی دہشت گرد نے مکمل منصوبہ بندی کیساتھ یہ کاروائی انجام دی ۔ ایسے خوفناک واقعات سے دنیا  میں انسانیت کی تذلیل کی جو مثال پیش کی گئی وہ کسی بھی ملک کے اپنے حالات کے لیئے بھی تباہ کن ثابت ہو سکتی تھی  وہاں اتنے پریشان کن حالات میں
ایک اکیلی  عورت جیسنڈا آرڈرن جس کی انصاف پسندی ، اعتماد اور ہمدردی نے عورت کا مقام ان سینکڑوں حمکران مردوں میں بلند کر دیا ۔ جس نے مامتا، محبت اور سچائی کا پرچم تھام کر اپنے ناانصاف عالمی طاقتوں کے صدور اور میڈیا کے  سامنے  حق کی آواز کو بلند کر دیا ۔ بے خوف ، جراتمند ، پراعتماد عورت،  سچی عورت ، جسے دیکھ کر خوشبو، اوس ، جھرنا، مرہم ، جگنو جیسے الفاظ کے صحیح معنے سمجھ میں آنے لگتے ہیں ۔
دنیا میں عالمی طاقتوں کی سازشوں نے جہاں معصوم مسلمانوں کی زندگیاں  عذاب بنا رکھی ہیں ۔ ان کا لہو پانی سے ارزاں کیا جا چکا ہے ۔ ان کی عزتوں کو روندنا اپنی بڑائی مانا جا رہا ہے ۔ ایسے عالمی افق پر مسلمانوں کو اس سچی آواز نے یہ پیغام دیا کہ ہاں ابھی کچھ لوگ سچائی اور معصومیت کا ساتھ  دینے کو، اسے پہچاننے کو اور اسے تسلیم کرنے کو اسی دنیا میں موجود ہیں  ۔ وہ کام جو بڑی طاقتوں کو بڑا بناتیں، انہوں نے تو کرنے کا نہ حوصلہ دکھایا نہ ہی ظرف ، لیکن ایک چھوٹے سے امن پسند ، انسانیت نواز  اور محبت پاش قوم کی مہربان اور سچی خاتون وزیر اعظم جیسنڈا آرڈرن نے کر دکھایا ۔ مشکل کی اس گھڑی میں جہاں بڑے بڑے مرد لیڈران کے قدم کوئی فیصلہ کرتے ہوئے لڑکھڑا جاتے ہیں ۔ وہاں اس ثابت قدم خاتون نے لمحہ بھر میں ایسا فیصلہ کیا جس نے اسے رہتی دنیا تک تاریخ کے صفحات میں زندہ و جاوید کر دیا ۔ نیوزی لینڈ کی پوری  قوم اس خاتون کے بطور انکی وزیر اعظم انتخاب پر مبارکباد کی مستحق ہے ۔ اور جیسنڈا آرڈرن نے اپنے انتخاب کو اپنے عمل سے  اپنی قوم کا بہترین انتخاب ثابت کر کے دکھا دیا ۔ خدا کی  محبت کی وہ آواز جو آذان کی صورت  سیدھا دلوں میں ترازو ہو جاتی ہے ، جسے کم ظرف لوگ سننے سے انکار کرتے ہیں اس آواز کو اپنی پوری قوم کو سنا کر ان کے دلوں  کو نور کے راستے  کے لیئے کھول دیا ۔ 
جیسنڈا کے ان بہادرانہ اقدامات نے نہ صرف مسلمانوں کے دلوں میں بلکہ اپنے ملک میں موجود ہر کمیونٹی ، ہر مذہب کے لوگوں کو اس بات کا یقین دلایا ہے کہ وہ اس وقت دنیا کے سب سے محفوظ ، سب سے عظیم اور سب سے باوقار ملک میں موجود ہیں ۔
 جہاں آپ تک پہنچنے والی کسی بھی مصیبت کو سب سے پہلے آپ کی حکومت سے ٹکرانا ہو گا ۔ آپ کے خاندان کسی بھی مشکل کی صورت میں بے آسرا اور لاوارث نہیں چھوڑے جائینگے ۔ بیشک بہادر قومیں ہی بڑے اور منصفانہ فیصلے لے سکتی ہیں ۔ میں ممتازملک اپنی پوری پاکستانی قوم کی جانب سے مادام جیسنڈا آرڈرن کو اتنے مشکل حالات پر کامیابی سے بہترین انداز میں قابو پانے پر تہہ دل سے مبارکباد پیش کرتی ہوں ۔  اس امید کیساتھ کہ بہت جلد  اس عیسائی دہشتگرد کو عبرتناک سزا دی جائے گی ۔ اور اس بات کو یقینی بنایا جائیگا کہ دہشتگرد کا کوئی بھی مذہب ہو وہ قابل معافی نہیں ہو سکتا ۔  آپ کی انصاف پسندی کو ، مشفقانہ طرزعمل کو کھڑے ہو کر سلیوٹ پیش کرتی ہوں ۔ اور اس بات کی خواہش کرتی ہوں کہ اگر اس سال کسی کو دنیا میں مہربانی ، مذہبی رواداری یا امن کا نوبل پرائز دیا جانا ہے تو اس کے لیئے جیسنڈا آرڈرن سے بڑھکر اور کوئی نام نہیں ہو سکتا ۔ میں اپنی پاکستانی قوم ،مسلم امہ اور انسانی معاشرے کی جانب سے آپ کے لیئے ڈھیروں دعائیں اور نیک خواہشات کے گلدستے پیش کرتی ہوں ۔ جو اس دنیا میں امن و آشتی اور بھائی چارے کی خوشبو پھیلائے رکھیں ۔ آپ پر اور آپ کی قوم پر سلامتی ہو۔  آمین