یوم پاکستان23مارچ 2014 شاہ بانو میر

http://thejazba.com/%DB%8C%D9%88%D9%85%D9%90-%D9%BE%D8%A7%DA%A9%D8%B3%D8%AA%D8%A7%D9%86-%D8%B4%D8%A7%DB%81-%D8%A8%D8%A7%D9%86%D9%88-%D9%85%DB%8C%D8%B1/

       یوم پاکستان23مارچ 2014

شاہ بانو میر            

انصاف وویمن ایسوسی ایشن کا یومِ پاکستان

اعلامیہ انصاف آج سے اپنے گھر سے شروع کیا جائے ـ احتساب اپنی ذات سے شروع کیا جائے جب ہی نیا کامیاب پاکستان ممکن ہے

23 مارچ بروز اتوار انصاف وویمن ایسوسی ایشن کی جانب سے خواتین کیلیۓ خصوصی تقریب کا اہتمام کیا گیا ـ 

جس کا مقصد قرار دادِ پاکستان کو ازسر نو دہرا کر موجودہ نازک حالات میں خواتین کے شعور کو بحال کرنا تھا ـ

انصاف وویمن ایسوسی ایشن کی ٹیم کے بھرپور کوششوں سے گزشتہ تمام پروگرامز کی طرح الحمد لِلہ یہ پروگرام بھی خواتین کو عرصہ دراز تک یاد رہے گا ـ انصاف وویمن ایسوسی ایشن واحد ایسوسی ایشن ہے جس کے پروگرامز میں دین اور دنیا دونوں کا بہترین امتزاج ملتا ہے ـ

اس پروگرام کی خاص بات یہ رہی کہ ہمیشہ کی طرح خواتین نے پوری دلجمعی اور توجہ سے پروگرام کو سنا ـ اور اس کے ہر لمحے سے محظوظ ہوئیں ـ

پروگرام کی نظامت پیرس کی قابلِ فخر خاتون محترمہ ممتاز ملک صاحبہ نے کی ـ ممتاز ملک کا نام کسی تعارف کا محتاج نہیں ہے ـ پیرس کی ان گنی چُنی خواتین میں ان کا شمار ہوتا ہے جو ادب ہو صحافت سماجی ہو یا سیاسی ہر شعبے میں اپنی الگ مضبوط سوچ کے ساتھ تحریر کی صورت اپنا فرض ادا کرتی دکھائی دیتی ہیں ـ بہترین شاعرہ ہیں ـ نامور میزبان ہیں ـ 2 بہترین اصلاحی شاعری پے مبنی کتابوں کی شاعرہ ہیں ـ 3 کتابوں کی عنقریب اشاعت کروانے والی ہیں ـ انقلابی سوچ کی حامل خاتون ہیں ـ جو بڑی جرآت اور بہادری سے حالات کے سامنے ڈٹ کر اپنا مؤقف پیش کرتی ہیں ـ سچائی کوخونِ جگر دے کر جب کوئی تحریر منظرِ عام پے آتی ہے تو متعلقہ شعبے پے برق بن کر گرتی ہے ـ بطورِ خاتون ان کی مداح ہوں کہ چاہتے ہوئے بھی ان کی طرح اتنی تلخ سچائیاں لکھنے سے قاصر ہوں ـ اللہ کی خاص عنایت ہے ان پے کہ قلم جب اٹھتا ہے تو قیامت بپا کر دیتا ہے ـ

ممتاز ملک کی تحریر جیسے قاری کو اختتام تک اپنے سحر میں جکڑے رکھتا ہے ـ ویسے ہی ان کے بھرپور اندازِ نظامت میں وہی ماحول کی غلامی اس پروگرام میں بھی دکھائی ـ اڑہائی گھنٹے سے طویل دورانیے کے اس پروگرام میں ان کی ذہانت معلومات درد فکر مستقبل کیلیۓ نیک تمناؤں کا بیان اس کے ساتھ شدتِ جزبات سے کہیں کہیں ان کی آواز کو آنسوؤں میں ڈبو گیاـ

ہر خاتون نے ان کی آواز کی سچائی درد اور پیغام کو سن کر دل سے قبول کیا ـ بہترین میزبان کا حق ادا کرتے ہوئے آج کی اس تقریب کو مزید یادگار بنا دیا ـ ممتاز ملک پیرس کمیونٹی کا وہ تابناک مستقبل ہے کہ اگر اس کی تحریر کی ترشی کونظرانداز کر کے اس کے نرم نازک ذہن اور ملائم سوچ تک کسی کی رسائی ہو تو وہ ایک نئی ممتاز ملک کو پا لے گا ـ

لیکن

ہماری کمیونٹی کی ازلی بد نصیبی یہ ہے کہ ہم نے صرف سنی سنائی باتوں پے کان دھرے ـ کسی کے حال ماضی کی مثبت کوششوں کو کام کو سراہنا شائد ہمارے کمزور ذہن کی استطاعت سے باہر ہے ـ ممتاز بھی اسی ذہنی تعصب اور رویے کا شکار ہےـ

اب کچھ ذکر 23 مارچ کے حوالے ہوئے پروگرام کا ـ

پروگرام کے آغاز میں ممتاز ملک نے بانی ایسوسی ایشن محترمہ شاہ بانو میر صاحبہ اور ان کی پوری ٹیم کو شاندار الفاظ میں خراجِ تحسین پیش کیا ـ

پروگرام کے آغاز سے لے کر اس کے اختتام تک حسبِ روایت ممتاز ملک صاحبہ نے پروگرام کو یوں گرفت میں رکھا کہ اس کا تسلسل دلچسپی کا معیار گزرتے ہوئے ہر لمحے کے ساتھ اور زیادہ ہوتا رہا ـ

پروگرام کا باقاعدہ آغاز محترمہ نوشین محمد صاحبہ نے خوش الحانی سے تلاوتِ کلام ِ پاک سے کیا سورہ الحجرات کی آیت 11 اور 12 بہت رِقت اور فہم کے ساتھ خواتین کے سامنے پیش کیا گیا ـ تلاوتِ کے بعد ان آیات کا ترجمہ اور تفسیر نوشین صاحبہ نے بڑی محنت اور جانفشانی سے تیار کی تھی اس کو پیش کیا ـ سورہ الحجرات کی آیات کا خلاصہ جس میں خواتین کو بتایا گیا کہ قرآن پاک کی اس انتہائی اہم سورہ مبارکہ میں کس طرح اللہ رب العزت نے فرمایا

کہ

غیبت حسد بہتان تراشی اللہ کی بہترین عطا ہمارے “” دل “” کو برباد کر کے ہمارے نامہ اعمال کو ہماری نیکیوں سے خالی کر دیتا ہے ـ “” دل “” جس کو قلب سلیم کی تشکیل کیلیۓ بنایا گیا ـ تا کہ انسان اللہ کی تخلیقات پے غوروفکر کرے اور اپنی کوتاہیوں خامیوں کو دور کر کے اس دل کو مطہر کرے اس کی اس کاوش سے دل صاف ہوگا اور قلب سلیم میں ڈھل جائے ـ

اگر ایسا نہ کیا تو یہی”" دل “”

تمام اخلاقی کمزوریوں کی آماجگاہ بنا کر ہم اس کو گناہوں میں لتھڑا ہوا دل بنا دیتے ہیں ـ جسے قلبِ اثیم کہتے ہیں ـ

خواتین نے انتہائی انہماک سے مکمل سنجیدگی سے تفسیر کو سنا ـ ٌ

انصاف ایسوسی ایشن کی چھوٹی سی بلبل پیاری بیٹی نے حمدِ باری تعالٰی ادب و احترام سے پیش کیاـ ایسوسی ایشن کا ہر ممبر اس کا قیمتی اثاثہ ہے ـ یہ چہکتی ہوئی معصوم بلبل بچپن سے پاکستان کے پروگرام میں بڑے ذوق و شوق سے حصہ لیتی ہے ـ

محترمہ ریحانہ کوثر صاحبہ انصاف وویمن ایسوسی ایشن کا قیمتی سرمایہ عالمہ ہیں اور علمی لحاظ سے تصدیق شدہ مواد پے بیان فرماتی ہیں ـ خواتین میں مذہبی حوالے سے الگ منفرد مقام رکھتی ہیں ـ آج کے اس پروگرام میں انہوں نے حدیث مبارکہ پیش کیں ـ خواتین کو دین کے ساتھ دنیا کو کیسے چلانا ہے یہ صرف آپ کو تب شعور ملے گا جب آپ قرآن و احادیث کا مطالعہ کریں گی ـ اپنی نسل کو سنوارنے کیلیۓ اپنی آخرت کو بہتر بنا کر شرمندگی سے بچنے کیلیۓ آج یہ ہمیں کرنا ہوگا کہ خود کو اپنی اولادوں کو قرآن سے جوڑیں ـ لفاظی یا زبانی کلامی یہ کہہ دینا وہی نتیجہ دے گا جو آج ہمیں پاکستان کی صورت مل رہا ہے ـ عمل کے بغیر دین کی پکار دینا لاحاصل ہے ـ وہ کہیں جو کر سکتے ہیں ـ اپنے اعمال کو عمل کی صورت ڈھالیں جیسے ہمارے اسلاف کا شعار تھا ـ

محترمہ ممتاز ملک صاحبہ نے انصاف وویمن ایسوسی ایشن کی بانی محترمہ شاہ بانو میر صاحبہ کو اور ان کی ٹیم کو خراجِ تحسین پیش کرتے ہوئے ان کی ایسوسی ایشن کو کمیونٹی کیلیۓ مثبت پیش رفت قرار دیا ـ ممتاز ملک نے شاہ بانو میر صاحبہ کی ادبی خدمات کے حوالے سے خراج تحسین پیش کرتے ہوئے کہا کہ آپ کی سال ہا سال سے کی گئی تحریری کاوشوں نے اب حقیقت کا روپ دھارا ہے ـ آج کئی خواتین اس سچ کے کٹھن سفر میں آپ کے ساتھ ہیں ـ ان کا کہنا تھا کہ ایک پھول آج کئی باہُنر خواتین کے ساتھ مہکتا ہوا دلکش رنگوں کے خوبصورت پھولوں کا گلدستہ بن چکا ـ جو انشاءاللہ اپنی خوشبو کو ہر سو پھیلا کر” پاکستان بہار”کا پیام ثابت ہوگا ـ

پروگرام کو آگے بڑہاتے ہوئے

ممتاز ملک صاحبہ نے قائد اعظم کے سفر کا آغاز کیا اور ان کی سیاسی جدوجہد کو بیان کیا ـ راہ میں حائل مشکلات سے نبردآزما ہوتے ہوتے ہوئے قائد 1940 سے 1947 تک کے قلیل عرصے میں پاکستان حاصل نہ کر پاتے اگر ان کی ذاتی زندگی کی اداسی کو ان کی بہن سنبھالا نہ دیتیں ـ محترمہ فاطمہ جناح کے ذکر کے بغیر قرار داد سے قیام پاکستان کا تذکرہ ادھورا ہے ـ انہوں نے بتایا کہ کیسے فاطمہ جناح نے ڈینٹسٹ ہوکر اپنی پریکٹس ختم کی اور پاکستان کے حصول کیلیۓ اپنے بھائی کی گرتی ہوئی صحت پے اپنی ساری توجہ مرکوز کر دی ـ

نمناک آواز میں ممتاز ملک نے جب دی جانے والی لاکھوں قربانیوں کا ذکر کیا تو ہال میں موجود خواتین کی آنکھیں بھی نمناک ہو گئیں ـ ماؤں کا بیٹیوں کی عزتوں کو محفوظ کرنے کیلیۓ ان کو مار دینا ـ کیسے درندہ صفت سکھوں نے اس وقت حاملہ خواتین کے پیٹ نیزوں برچھیوں اور کرپانوں سے چاک کئے اور بچوں کو مار دیا ـ آڑہائی لاکھ خواتین آج بھی سکینہ سے بلونت کور بنی ہوئی بھارت میں سسک رہی ہیں ـ جوانوں کے لاشوں سے جب بھرا خطہ ارض تو خون کی سرخی نے لفظ “”پاکستان “” لکھا ـ

آج اس ملک کے ساتھ ہمارے حکمران کیا کر رہے ہیں؟

خود

ہم کیا کر رہے ہیں؟

آج کا بکھرتا تباہ ہوتا پاکستان اس وقت کے قائد کی سوچ میں نہیں تھا ـ ورنہ شائد وہ جدجہد ملتوی کر دیتے ـ

خواتین کو اب سوچنا ہوگا ـ عملی زندگی میں اس ملک کو بچانے کیلیۓ ماں بن کر نہیں مجاہدہ بن کر کوشش کرنی ہوگی ـ اس ملک کو مضبوط کرنا ہے اور قائم رکھنا ہے ـ آج اگر یہ ملک تباہی کی طرف جا رہا ہے تو یقینی طور پے اس میں آج کی ماں کی کوتاہی ہے جس نے اپنی اولاد کو درست سمت نہیں دی ـ خواتین کو زمانہ قدیم کی باہمت خاتون کی طرح اپنے بچوں کی تربیت کیلیۓ خود کو منظم کرنا ہوگا تا کہ وہ ایسی نسل تیار کر سکے جو دفاع وطن کے ساتھ ساتھ استحکام وطن بھی کر سکے ـ

روحی بانو

معروف سماجی نام خواتین کے لئے قابل احترام شخصیت سدا بہار مزاج بے ضرر سوچ کی مالک ـ مثبت رویے کی الگ پہچان ـ اچھا بولیں اچھا سنیں اچھا کہیں ـ کی عملی تفسیر ـ

تقریر کے آغاز میں ہال میں تیرتی تالیوں کی آواز نے بتا دیا کہ وہ اپنی سوچ کے ساتھ مقبول ہیں ـ

محترمہ روحی بانو نے انصاف وویمن ایسوسی ایشن کی بانی محترمہ شاہ بانو میر صاحبہ کو ایسوسی ایشن کے بامقصد قیام اور اسکی کمیونٹی کیلیۓ کی گئی خدمات پے مبارکباد پیش کی ـ

اپنی تقریر میں انہوں نے کہا “” کہ عرصہ دراز سے جاری شاہ بانو میر صاحبہ کی ادبی سماجی سیاسی خدمات کو محسوس کرتے ہوئے دیکھتے ہوئے دل میں اعتراف کرنے کے باوجود یہ بد نصیبی ہے کہ آج تک ان کو جو مقام ان کا حق تھا وہ ہم نے نہیں دیا ـ

محترمہ روحی بانو صاحبہ نے بہت پرجوش لہجے میں خواتین پے زور دیا کہ وہ گھروں تک خود کو محدود نہ کریں بلکہ اچھی خواتین کے ساتھ پاکستان کیلیۓ جدوجہد کریں ـ

ان کا مزید کہنا تھا کہ پاکستان کا المیہ ہے کہ ہمارے درمیان منفی سوچ کا تاثرپیدا کیا جاتا ہے جس کی وجہ سے اتحاد نا پید ہے ـ اور ہم سب کمزور ہو کر ٹکڑوں میں بٹ چکے ہیں ـ جس سے نہ صرف پاکستان کمزور ہوا بلکہ ہم خود بھی طاقت بکھیر کر تہی دست ہو گئے ـ

ان کا کہنا تھا

کہ آج وقت کی اہم ضرورت ہے کہ خواتین اس قرار داد پاکستان کے موقعے پے اتحاد کی یگانگت کی نئی قرار داد پیش کریں ـ آج قیام پاکستان کے بعد استحکام پاکستان کی اشد ضرورت ہے ـ روحی بانو صاحبہ نے مزید کہا کہ خاتون اپنی الگ شناخت رکھتی ہیں خصوصی طور سے پاکستانی خاتون باوقار انداز میں باہر نکل کر نہ صرف کام کر سکتی ہے بلکہ بہترین رول ماڈل بن کر نئی نسل کیلیۓ رہنما کا کردار ادا کر سکتی ہےـ

ایک دوسرے کے غم میں شریک ہوں درد بانٹیں ـ خوشیاں دینا سیکھیں ـ سوچ کا بہترین توازن قائم رکھیں ـ عبادت اپنا خاصہ بنا لیں ـ رات سونے سے قبل اپنے پورے دن کا محاسبہ کریں کہ آج کہاں کہاں آپ سے غلطیاں ہوئیں ـ اگلے روز ان سے اجتناب برتیں ـ اپنی شخصیت پے خاص توجہ دیں اور اس کو ہرروز بہتر سے بہتر بنائیں تاکہ پاکستان بہتر سے بہتر ہو ـ روحی بانو نے تمام خواتین سے اپیل کی کہ وہ ان خواتین کے ساتھ مل کر بھرپور انداز میں کام کریں جو محدود وسائل میں خواتین کے درمیان رہ کر وطنِ عزیز کی فلاح و بہبود کیلیۓ کام کرنا چاہتی ہیں ـ

بھرپور تالیوں کی گونج میں ان کی تقریر اختتام پزیر ہوئی ـ

محترمہ وقار النساء صاحبہ

انصاف وویمن ایسوسی ایشن کی پہچان در مکنون کی ایڈیٹر ادبی کاوشوں پے مبنی منفرد نام ـ وقار انساء صاحبہ نے اپنی تقریر میں تحریک پاکستان سے قبل قائد اعظم کی زندگی تعلیمی کارکردگی پھر سوچ کا تبدیل ہونا اور مسلمانوں کیلیۓ الگ خطہ ارض حاصل کرنے کی اصل وجہ خطبہ الہ آباد میں علامہ اقبال کی جانب سے پیش کئے گئے دو قومی نظریے کو قرار دیا ـ

قائد نے علامہ کے اس خواب کی تکمیل میں دن رات کیسے صرف کئے اور کیسے پاکستان کا حصول ممکن ہوا اس پے روشنی ڈالی ـ وقار انساء صاحبہ نے مہمانوں کو خوش آمدید کہتے ہوئے امید ظاہر کی کہ یہ محبتوں کا تعاون کا مخلصانہ رابطہ ہمیشہ جاری رہے گا تاکہ مضبوط پاکستان کی

تعمیر نو کا اہتمام ہو ـ

پیاری بیٹی کو دعوت دی گئی کہ وہ آکر ملی نغمہ پیش کریں

موج بڑھے یا آندھی آئے دیا جلائے رکھنا ہے

گھر کی خاطر سو دکھ جھیلیں گھر تو آخر اپنا ہے

خوبصورت معصوم آواز میں موجود پاکستان کی محبت کا طلسم سب کو جیسے جکڑے ہوئے تھا ـ سب نے لے سے لے ملا کر ملی نٰغمہ میں ساتھ دیا ـ ماحول صرف “” پاکستان”" بن گیاـ

محترمہ نگہت صاحبہ کا تعارف ممتاز صاحبہ نے کروایا ـ محترمہ نگہت صاحبہ اعلیٰ تعلیم یافتہ خاتون خواتین سے ہمکلام ہوئیں تو فرمایا کہ آج کے مایوس دور میں

“” اعتزاز حسن “” جیسے نوجوان ہمیں اپنے خون سے قربانی کا دیا روشن کر کے ایک بار پھر زندہ کر دیتے ہیں ـ شائد یہ سمجھانے کی کوشش کرتے ہیں کہ

ذرا نم ہو تو یہ مٹی بڑی زرخیز ہے ساقی ـ

حکومتِ پاکستان کی جانب سے ستارہ شجاعت ملنے پے ان کا کہنا تھا کہ ایسے قومی ہیرو کو ہمیں اپنے ارادوں میں پروگرامز میں اجاگر کرنا ہوگا ـ مایوسی ناامیدی کے اس دور میں بلاشبہ اعتزاز حسن فتح کا باطل کے سامنے ڈٹ جانے کا کامیاب نام ہے ـ

نگہت صاحبہ نے کہا کہ وہ خواتین کے ساتھ مل کر انشاءاللہ اپنے تحریر سفر کا بہت جلد آغاز کریں گی ـ انہیں امید ہے کہ ان کے ساتھ موجود خواتین ان کی رہنمائی کریں گی ـ خواتین نے تالیوں کی بھرپور گونج میں ان کو خوش آمدید کہا ـ

روحی بانو نے اپنی میٹھی پیاری آواز میں ملی نغمہ سنایا ـ اس موقعہ پے ہال میں موجود خواتین نے ان کا بھرپور ساتھ دیا ـ پاکستان کی محبت ہر چہرے سے جھلک رہی تھی ـ آواز میں موجود جوش اور ماحول کی کیفیت بتا رہی تھی کہ اب وہ وقت دور نہیں جب نیا پاکستان باشعور عورت کے ساتھ منظرِ عام پے آئے گا ـ

پروگرام کے آخر میں بانی ایسوسی ایشن محترمہ شاہ بانو میر صاحبہ کا خطاب تھا ـ

انہوں نے معزز مہمانوں کا شکریہ ادا کیا محترمہ ممتاز ملک صاحبہ جنکی کمپئیرنگ نے بلاشبہ آج کے دن کو ہمیشہ ہمیشہ کیلیۓ یادگار بنا دیا ـ شاہ بانو میر صاحبہ نے “” محترمہ ممتاز ملک صاحبہ “” کو پیار سے”" خطرناک ذہین خاتون”" کہا ـ جس روانی جس فہم و فراست سے وہ بول رہی تھیں ـ وہ اپنی مثال آپ ہے ـ

محترمہ شاہ بانو میر صاحبہ نے ممتاز ملک کی علمی ادبی سماجی سیاسی کاوشوں پے روشنی ڈالتے ہوئے ان کو ملک و قوم کا گرانقدر سرمایہ قرار دیا ـ

ان کی نئی کتاب “” میرے دل کا قلندر بولے”" کی کچھ نظمیں خواتین کے سامنے پیش کیں ـ تاکہ خواتین اندازہ کر سکیں کہ ان کے درمیان کیسی کیسی انمول ہستیاں موجود ہیں ـ جو اپنی گھریلو ذمہ داریوں کی وجہ سے محدود حلقہ رکھتی ہیں ـ مگر ان کا کام انشاءاللہ ایک دن ان کے نام کے ساتھ ایسے تسلیم کیا جائے گا جیسے سورج کے آنے کے ساتھ ہی نور کا تصور ذہن میں آتا ہے ـ شاہ بانو میر صاحبہ ممتاز ملک کا ایسوسی ایشن کی جانب سے شکریہ ادا کیا ـ

محترمہ روحی بانو صاحبہ کیلیۓ شاہ بانو میر صاحبہ نے کہا

کہ روحی نے میرے لئے کہا کہ مجھے وہ مقام نہی ملا جو میراحق ہے ـ لیکن

آج

انصاف وویمن ایسوسی ایشن کی ٹیم جیسی مضبوط خواتین کا مکمل ساتھ انتظامی معاملات ہوں یا ذاتی ہر طرح یہ ٹیم مکمل سپورٹ کرتی ہے ـ خوشی ہو یا غم اس ٹیم نے خاندان کی صورت اختیار کر لی جو اس بات کی نشاندہی کرتی ہے کہ پہچان وہاں ہو گئی جہاں تسلیم کی صلاحیت ہےـ

اپنی ٹیم کے علاوہ ممتاز روحی نوشین محمد ریحانہ وقار انساء باقی تمام ٹیم جیسی اور معزز مہمانوں جیسی خواتین کا ساتھ کھڑے ہونا اس بات کی دلیل ہے

کہ

میری سوچ کامیاب ہو گئی ـ با مقصد کام بہترین سوچ کی حامل خواتین کے ساتھ کرنے کا خواب شرمندہ تعبیر ہوا ـ

روحی بانو کیلیۓ ان کا کہنا تھا

کہ

روحی صاحبہ کو وہ خاتون سمجھتی ہیں کہ جن کی اچھائی کو آخری حد تک آزمائش کی بھٹی میں تپایا گیا اسی لئے آج وہ کندن بن گئیں ـ کئی سال کام کے باوجود روحی کو نمایاں نہیں ہونے دیا گیاـ

صبر کی انتہا ہوتی ہے ـ

شائد وہ انتہاء ختم ہوئی تو روحی نے اپنے آپ پے یقین کیا اور تنہا میدان میں داخل ہوئیں با صلاحیت خاتون بہترین شخصیت سماجی پہچان کے ساتھ اب سیاسی میدان میں بھی الگ طاقتور نام کے طور پے جانی جاتی ہیں ـ

شاہ بانو میر نے مزید کہا

آج بھی اگر ہم اپنے سینئیرز کو سینیارٹی کو تسلیم کرتے ہوئے ان کے ساتھ مل کر چلیں تو نہ صرف کام کی صلاحیت میں خاطر خواہ اضافہ ہوگا بلکہ پاکستان کیلئے خواتین اثاثہ ثابت ہوں گی ـ

شاہ بانو میر صاحبہ کا کہنا تھا

کہ آج پاکستان سے محبت رکھنے والے ہر ہمدرد دل کو قرآن سے اپنا ٹوٹا ہوا رابطہ بحال کرنا ہوگا ـ سمجھنا ہوگا رب کے اس پیغام کو جس کو فراموش کر کے آج ہم دنیا کی ٹھوکروں میں آگئے ـ نظام کی تبدیلی ذہن کی تبدیلی سے مشروط ہے ” ذہن کی تبدیلی قرآن پاک کی مرہونِ منت ہے ـ

اپنی نسلوں کو سنوارنے کیلیۓ اپنی ذات کو بامقصد بنانے اور دوسروں کے احترام کیلیۓ وہ قوانین پھر سے پڑھنے ہوں گے جو قرآن میں آج بھی جگمگا رہے لیکن ہم اپنے نفس کی تاریکیوں میں اسے نہیں سمجھتے ـ

کام کرنےو الی خواتین معاشرے کا قیمتی سرمایہ ہیں ان کی حرمت احترام فرض ہے ـ ابہام الزام کے دور سے اب باہر آجائیں ـ کام پے توجہ دیں اچھائی کو پھیلانے کیلیۓ شکوک و شبہات کو پھیلا کر گندگی کو معاشرے میں نہ بڑہائیں ـ

اپنے ملک کی خستہ حالی پے رحم کھائیں اور تعمیری رویے اپنائیں ـ

اللہ کی ذات دلوں کے بھید جانتی ہے ـ اسی پے انحصار رکھیں ـ روحی بانو کی بات کو دہرایا کہ ایک انگلی کسی کی طرف اٹھانے والے باقی ماندہ تین انگلیوں کو اپنی جانب بھی دیکھیں ـ

شاہ بانو میر صاحبہ نے مزید کہا

آئیں سب مل کر ایک روشن تابناک پاکستان کے حصول کیلیۓ ایک ساتھ 1947 کی طرح کھڑے ہوں ـ اعتزاز حسن رول ماڈل ہے کہ وہ اس عمر میں پاکستان کو لہو دے کر بچا گیا ـ کیا ہم اکٹھے ہو کر اس ملک کو نہیں بچا سکتے ؟

خواتین کیلیۓ ان کا کہنا تھا اپنے درمیان میں موجود غلط فہمیاں پھیلانے والوں کو ناکام کریں ـ نسلوں کی بقا کیلیۓ منفی سوچ رویے ترک کر کے مثبت اندازِ فکر اپنائیں ـ تمام خواتین مل کر قرار داد پاکستان کو از سر نو مضبوط کریں ـ

پروگرام کے اختتام پے ممتاز ملک نے اعلامیےمیں کہا کہ “” اعتزاز حسن کو خراج تحسین پیش کرتے ہیں ـ وہ ہمارا قومی ہیرو ہے “”

اس دعا کے ساتھ پروگرام کا ختتام ہوا کہ

خدا کرے کہ مری ارضِ پاک پے اترے وہ فصلِ گل

جسے کبھی اندیشہ زوال نہ ہو

خدا کرے کہ اک بھی ہم وطن کیلئے

حیات جرم نہ ہو زندگی وبال نہ ہو

یہاں جو پھول کھلا وہ کھلا رہے برسوں

اسے کبھی بھی تشویشِ ماہ و سال نہ ہو

آمین

پروگرام کے آخر میں ہال میں موجود خواتین نے قومی ترانہ پورے احترام سے سنا تالیاں بجا کر قرار دادِ پاکستان کی تجدید کی ـ یوں وطن سے ہزاروں کلو میٹر دور انصاف وویمن ایسوسی ایشن نے خواتین کیلیۓ پاکستان اور قرار داد کو بہت قریب سے محسوس کیا ـ

یوں

انصاف وویمن ایسوسی ایشن کا ایک اور پروگرام انمٹ یادوں کے نقوش چھوڑتا ہوا اختتام پزیر ہوا ـ

پروگرام کے آخر میں مہمانوں کی تواضع چائے اور دیگر لوازمات سے کی گئی ـ

ہے جُرم اگر وطن کی مٹی سے محبت

                                                     یہ جُرم سدا میرے حسابوں میں رہے گا 

! شئیر کریں

● (19) بچوں میں تفریق/کالم۔سچ تو یہ ہے

(19) بچوں میں تفریق

تحریر: ممتازملک۔ پیرس

 ماں باپ کی مثال بچوں کے لیئے ایک سائبان کی سی ہوتی ہے۔ ایک پیڑ کی سی ہوتی ہے جو اپنی اولاد کے لیئے خود تو تمام عمر مشقت کی دھوپ میں جلتے ہیں لیکن اپنی اولاد کے لیئے پھلدار اور سایہ دار درخت ہوتے ہیں ۔ ماں باپ کی قدر وہی لوگ جانتے ہیں جنہوں نے انہیں کھو دیا ہو یا پھر ان کے ساتھ زندگی گزارنے کا جنہیں زیادہ موقع نہ ملا ہو ۔ ماں باپ اپنے بچوں کے لیئے اپنی زندگی کا ہر عیش و آرام تیاگ دیتے ہیں۔ اپنی خوشیوں کو بھینٹ چڑھا دیتے ہیں تا کہ ان کے اولاد کی خواہشات پوری ہو سکیں ۔ ان سب قربانیوں کے بعد بھی ایسی کیا وجوہات ہوتی ہیں کہ بہن بھائیوں میں اکثر وہ محبت اور رسپیکٹ (عزت) پیدا نہیں ہو پاتی جس کی ضرورت ہوتی ہے ، عام طور پر دیکھا گیا ہے کہ ماں اور باپ اپنے سب سے بڑے یا چھوٹے یا کسی اکلوتے بیٹے یا بیٹی کو اپنا خاص لاڈلا بنا لیتے ہیں ۔ ہر دوسرے بچے کا حق اور محبت بھی اسی ایک مخصوص بچے کے لیئے مخصوص کر دیا جاتا ہے ، کھانا ہے تو سب سے اچھا حصہ اور سب سے پہلے اسی کو ملے گا ، کپڑا سب کے لیئے تو معمولی یا کم قیمت لیکن کسی ایک بچے لکے لیئے خاص اور مہنگے ہوں گے ، کسی کو تو سکول کے کسی پروگرام میں جانے کی اجازت ہی سرے سے نہیں ہے اور کسی کو راتوں کو بھی گھر سے باہر رہنا معاف ہے ۔ اور تو اور جیب خرچ میں بھی اکثر ہمارے گھروں میں بچوں اور لڑکوں لڑکیوں کے بیچ خاص فرق روا رکھا جاتا ہے ۔ اور تو اور نالائق لڑکے کو دھکا شاہی سے اچھے سکول اور کالج بھیجنے کی کوشش کی جائے گی چاہے وہ نہ پڑھنا چاہے یا کتنا بھی نالائق ہو، کئی کئی بار فیل ہی کیوں نہ ہوتا ہو ،  جبکہ لڑکیوں کو لائق ہونے اور سکول کالج جانے کے شوق کے باوجود، پوزیشنز لینے کے باوجود دھمکا کر گھر بٹھا لیا جاتا ہے ،کہ اس کی پڑھائی سے ہمیں کیا فائدہ ۔  اگر وہ لاڈلی ہے تو بھائیوں کا ہر حق بھی چھین کے اس کی جھولی میں ڈال دیا جائے گا ۔ جو بھی بیٹا یا بیٹی لاڈلی قرار دے دی جائے پھر اس پر سات خون معاف ہیں۔ وہ اپنی عمر کا لحاظ کیئے بنا ہر ایک پر حاکم بنا دیا جائے گا ۔ بڑے ہو جانے پر بھی اسے بہن بھائیوں کی کمائی کھانے کا حق دے دیا جاتا ہے۔ اگر بھائی کہیں باہر ہے تو اس کے سوٹ کیسز اس کی بیوی کے بجائے وہ لاڈلا یا لاڈلی کھولے گا ۔ تحفوں کی تقسیم بھی اسی کی مرضی سے ہو گی وہ کسی کو کیا دے کیا نہ دے یہ اس لاڈلی یا لاڈلے کی مرضی ہے ۔ کسی بھاوج کو بھی گھر میں رہنا ہے تو میاں یا ساس سسر کی مرضی سے نہیں بلکہ اس لاڈلے کی خوشنودی کے بعد ہی رہ سکتی ہے ورنہ گھر کا رستہ لے ۔ ماں باپ باہر رہنے والے بیٹے کا مال ایسی ہی لاڈلی یالاڈلے میں بانٹ کر اکثر اپنی قبر میں انگارے بھر لیتے ہیں ۔ کیوں کہ'' حدیث   نبی پاک ﷺ کا مفہوم ہے کہ جس نے ستر سال تک تہجد گزاری کی۔ عبادات کیں ، لیکن مرتے وقت اس نے صرف غلط وصیت کر دی تو گویا اس نے اپنی قبر میں انگارے بھر لیئے ۔ '' یہ جاننے کے باوجود ہمارے ہارے ہاں کے 70٪ والدین باہر بیٹھے ہوئے بیٹوں بیٹیوں کے مال اور جائیدادوں کو اپنے کسی لاڈلے یا لاڈلی کی جھولی میں ڈال جاتے ہیں اپنا انجام سوچے بنا اور کوئی پوچھے تو کہا جاتا ہے کہ بھئی تم تو باہر ہو تمہیں کیا کمی ہے یہ تو یہاں ہے اسے زیادہ ضرورت ہے ۔ جیسے باہر بیٹھی اولاد ان کی اولاد ہی نہیں ہے یا پھر باہر انہوں نے اس اولاد کو فیکٹریاں لگوا کر دی ہوئی ہیں جو نوٹ چھاپ رہی ہیں ۔ نہ تو خاموش رہنے والی اولاد کو کوئی عزت دی جاتی ہے نہ ہی کوئی اس کے حقوق کے لیئے آواز اٹھاتا ہے وہ چاہے کسی بھی تنگی کا شکار ہو لیکن ماں باپ کی شہہ پر دوسرے بہن بھائیوں کے مال پر پلنے والا یہ لاڈلا ان کا خون چوستا ہی رہے گا ورنہ ماں باپ کی ناجائز بددعائیں لے گا ۔ اور  خاص بات یہ کہ اسی حقوق کی پامالی میں وہ اس لاڈلی اولاد کوبھی اتنا تباہ کر چکے ہوتے ہیں کہ وہ لڑکا ہے تو دو وقت کی روٹی بھی خود کمانے کے لائق نہیں رہتا اور ساری عمر خیراتی ٹوکری بن کر گزار دیتا ہے ۔ اور بیٹی ہے تو باقی سبھی بہن بھائیوں کی زندگی کو عذاب بنائے رکھے گی ۔ ۔یاد رکھیں ماں باپ کی حقوق کی تو ہم بہت بات کرتے ہیں لیکن ان ماں باپ کو بھی یہ بات بتانے کی اشد ضرورت ہے کہ اس سے پہلے ماں باپ پر اس اولاد کے حقوق ہوتے ہیں جو ان کی مرضی سے اس دنیا میں آئی ہوتی ہے ۔ پہلے آپ اولاد کا حق ایمانداری سے ادا کریں پھر آپ دیکھیئے گا کہ اولاد کیسے آپ کے حقوق ادا کرتی ہے ۔ اور اولاد کے حقوق میں سب سے پہلا حق برابری کا ہوتا ہے بیٹا ہو یا بیٹی پہلی اولاد ہو یا آخری ماں باپ کو اس بات کا کوئی حق نہیں ہے کہ وہ ان میں حق ادا کرنے کے معاملے میں کسی قسم کا بھی کوئی فرق روا رکھیں ان کو اچھی تعلیم کا ایک جیسا موقع دینا بھی ان کا فرض ہے کیوں کہ علم حاصل کرنا ہمارے ہی دین میں ہر مرد اور عورت پر لازم کیا گیا ہے ۔ انہٰں  اپنی حیثت کے مطابق ایک ہی جیسا پہنائیں، کھلائیں اورباپ کی جائیدا میں  انہیں قانونی اور شرعی مکمل حصہ دیں ۔کسی ماں باپ کو اس بات کا کہیں بھی حق حاصل نہیں ہے کہ وہ جس بچے کا بھی چاہیں اپنی مرضی سے حق مار کر کسی کی بھی جھولی میں ڈال دیں جبکہ حصے اختیار کے ساتھ دے دینے کے بعد جس کا جو جی چاہے اسے جیسے چاہے استعمال کرے ۔ بھائیوں یا بہنوں کی کمائی ہوئی جائیداد کو باپ کی نام لگانے کی غلطی مت کریں کیوں کہ اسی بات کا فائدہ اٹھا کر بہت سے بہن بھائی لٹ چکے ہیں جو بات وہ والدین کی محبت میں کر رہے ہوتے ہیں انہیں یہ ہی نادان والدین لاڈلے یا لاڈلی کے نام کرکے  اصل اولاد کو کشکول تھما کر دنیا سے رخصت ہو جاتے ہیں ، لہذا بچوں کے حقوق میں برابری رکھیئے اور اپنے حقوق کو بھی دین کے اور قانون کے دائرے میں استعمال کیجیئے تاکہ آپ کی دنیا بھی پرسکون  ہو اور آخرت بھی بخیر ۔ یادرکھیں جو ماں باپ اپنے دینی اور قانونی دائرے میں رہتے ہوئے اپنے بچوں کے حقوق ادا کرتے ہیں انہیں کبھی بھی اپنی اولاد سے اپنے حقوق کی ادائیگی کا رونا نہیں رونا پڑتا بلکہ انہیں ان کے حقوق بنا کہے مل جاتے ہیں ۔ اولاد کا ماں باپ پر یہ حق ہے کہ انہیں ہر چیز میں برابری کا حق دیا جائے ، ایک جیسا کھلایا پلایا جائے ایک سی آذادی دی جائے، ایک سی تعلیم کا حق دیا جائے کیوں کہ ہمارا ہی دین ہے جو حکم دیتا ہے کہ ہر عورت اور مرد تعلیم حاصل کرے ۔ اپنے بچوں کو ایک سی محبت توجہ اور پیار دینا آپ پر خدا کی جانب سے فرض کیا گیا ہے ۔ اگر آپ اللہ کا حکم پورا نہیں کر رہے تو پھر اپنے حقوق کے لیئے رونا تو آپ نے اپنے مقدر میں خود ہی لکھ لیا ہے۔ آپ اپنے گھر کی باغ کے مالی ہیں اور اچھے مالی کو یہ ذیب نہیں دیتاکہ کسی پودے کو پانی دے اور کسی کو پیاسا چھوڑ دے جسے چاہے کھاد ڈالے اور جسے چاہے بنا کھاد کے برباد کر دے۔ ایسے مالی کا باغ کبھی آباد نہیں ہوتا بلکہ ایسا مالی کبھی اچھا مالی ہو ہی نہیں سکتا اور اسے کبھی اپنے باغ کا سکھ نصیب ہی نہیں ہوتا ۔ اچھے مالی بنئیے تاکہ آپ کو اس باغ کا جوبن دیکھنا نصیب ہو ۔ اچھے والدین بنیئے تاکہ آپ کو اپنی اولاد کی تابعداری نصیب ہو  ۔ 

                    ●●●

      تحریر: ممتازملک.پیرس

    مجموعہ مضامین: سچ تو یہ ہے

            اشاعت:2016ء

                  ●●●

غریب شہر ۔ کالم

غریب شہر

تحریر:

(ممتازملک ۔پیرس)

غریب شہر تو فاقے سے مر گیا محسن

امیر شہر نے ہیرے سے خود کشی کر لی

کیا بے بسی ہے کیا ضمیر فروشی ہے کہ ایک جانب ایک پارٹی تھر کی ریت پر جنگل میں منگل منا رہی ہے اور اسی تھر کے چند میل پر بے بس عوام اپنے ایڑیاں رگڑتے ہوئے معصوم بچوں کو بھوک کے ہاتھوں اس دنیا سے جاتے ہوئے دیکھ رہے ہیں ۔ خدایا کیا قہر ہے۔ پاکستان کی انتظامیہ بے حیائی کی اور کون کون سی منازل سر کریں گی ۔ شرمیلا فاروقی صاحبہ آپ ماں نہیں ہیں لیکن ایک عورت تو ہیں ۔ ایک عورت اس قدر سخت دل کیسے ہو سکتی ہے ؟ آپ نے تو اپنی پارٹی کے عشق میں خدا کو بھی فراموش کر دیا۔ کہیں آپ بے خود ہو کر بلاول ہاوس کو اپن قبلہ قرار دیتی ہیں تو کہیں اسی پارٹی کے کالے کرتوتوں پر پردہ ڈالنے کے لیئے کیسے کیسے کالے جھوٹ بولتی ہیں اور خوب دھڑلے سے بولتی ہیں ۔ کیا ہی اچھا ہوتا آپ اور آپ جیسے تمام چرب زبان لیڈرز اپنی زبان کو اس ملک سے بے ایمانی ،چور بازاری اور کرپشن کے خاتمے کے لیئے استعمال کرتے ۔ مگر افسوس ہمارے بہن بھائی پارٹیز کے عشق میں خدا کو بھی فراموش کر بیٹھے ہیں ۔ خدا کے لیئے پارٹی کی زبان بولیں لیکن اس جگہ رک جاؤ جہاں آپ کے ضمیر کی آواز شروع ہوتی ہے ۔  آپ سب کو یہ کیوں یاد نہیں رہتا کہ جہاں دوسرے کی تکلیف یا حق شروع ہوتا ہے وہاں ہمارے حق کی  حد ختم ہو جاتی ہے ۔ آپ لوگوں کو اللہ تعالی نے عوام نامی بھیڑوں کا گلہ بان مقرر کیا ہے اس کے ایک ایک بال کی آپ سے باز پرس کی جانی ہے ۔ اور یہ کوئی آسان حساب نہیں ہے۔ خدا سے اس کی امان مانگیں اور اپنے راستے کو سیدھا راستہ بنائیں ۔ ایک بار ایک واقعہ پڑھا تھا کہ کراچی میں ہی پاکستان بننے سے کچھ عرصہ پہلے ایک نواب صاحب رہا کرتے تھے کیا ٹھاٹھ باٹ تھے ۔ نواب صاحب کا معمول تھا ہر روز صبح کی سیر کو نکلا کرتے تھے ان کے جانے کے بعد ایک نوجوان ملازمہ ان کی خواب گاہ کی صفائی کی غرض سے داخل ہوئی تو بستر کی نرماہٹ دیکھتے ہوئے اس کا بھی جی چاہا کہ اس پر بیٹھ کر اچھل کود کر کے دیکھا جائے۔ اسی موج میں اسے بستر کی نرماہٹ میں نید آ گئی۔ اس کی آنکھ تب کھلی جب نواب صاب کا ہنٹر اس کی پیٹھ پر پڑا ۔ وہ تڑپ کر اٹھی اور نواب صاحب سے معافی مانگی ۔ لیکن نواب صاحب خوب غیض و غضب میں تھے انہوں  نے اسکو خوب ہنٹر لگائے کہ تیری یہ جراءت کہ تو میرے بستر پر یوں سوئے ۔ پہلے تو وہ لڑکی کچھ دیر مار کھا کر روئی پھر ایک دم سے ہنسنے لگی اور ہر ہنٹر پر ہنستے ہنستےلوٹ پوٹ ہونے لگی ۔ نواب صاحب کا ہاتھ رک گیا، پوچھا کہ لڑکی پاگل ہو کیا ؟ مار کھا کر بھی ہنستی ہو ، کیا تمہیں درد نہی ہوتی؟تو اس لڑکی نے جواب دیا  نواب صاحب مجھے درد تو ہوئی لیکن جب میں نے یہ سوچا کہ اس بستر  پر چند لمحوں کی نیند اور آرام کی سزا جو آپ نے دی یہ ہے تو سوچیں جس نے اس بستر پر عمر گزاری اس کی سزا اس بڑے مالک اس خدائے ربّی کی ہاں کتنی شدید ہو گی ۔ بس یہ سننا تھا کہ نواب صاحب کی حالت غیر ہو گئی ۔ انہوں نے اپنے بال نوچے، گریبان چاک کیا ،ایک چیخ ماری اور اس گھر سے کہیں دور بھاگ کھڑے ہوئے ، بعد میں سنا گیا انہوں نے کہیں کسی ویرانے میں زندگی خدا کی یاد میں گزار دی ۔ کیوں کیا اس نواب صاحب نے ایسا ؟ اس لیئے کہ اسے زندگی کی حقیقت کی سمجھ آ گئ ۔ لیکن آپ کو کس زبان میں یہ بات سمجھائی جائے ۔  آج پارٹی بازوں سے پارٹی ورکرز  سے نہایت احترام سے پوچھتے ہیں کہ آپ کا خدا کون ہے ؟آپ کا لیڈر؟ آپ کا رتبہ ، آپ کی جاگیر آپ کا جھوٹ ۔ خدا کے لیئے اب تو حق کے راستے پر لوٹ آئیں آپ سب بہت قیمتی لوگ ہیں۔ لیکن اپنا راستہ بھول بیٹے ہیں۔ آٰیئے صراط مستقیم آپ کی منتظر ہے ۔ 

               ۔۔۔۔۔۔۔۔۔۔

فیصلہ آپ پر ہے۔ کالم ۔ سچ تو یہ ہے

فیصلہ آپ پر ہے
ممتازملک۔ پیرس

 انسان کی تخلیق کی کہانی پڑھیں یا دنیا کی تاریخ پہ نظر ڈالیں  ہر جگہ یہ بات واضح نظر آتی ہے کہ ہمم ہمیشہ ہی ایک میل ڈومینیٹنگ سوسائٹی کا حصہ رہیں ہیں ، یہ دنیا یورپ کی مادر پدر آزاد سوسائٹی ہو یا انڈو پاک اور ایشینز کی مختلف رنگوں میں بٹی ہوئی معاشرت ۔ زمین پر انسانی تخلیق نے لاکھوں کروڑوں سال کا سفر مکمل کر لیا لیکن ہم آج بھی اسی بات میں الجھے ہوئے ہیں کہ یہ عورت ہے یہ مرد ہے ، جسم کی قید سے ہم اپنی سوچوں کو کبھی آذاد ہی نہیں کروا سکے ۔ ہم نے اپنی ذمہ داریوں کو عورت اور مرد کی گردان سے باہر کبھی نکلنے ہی نہیں دیا ۔  یورپ کو یہ بات سمجھ میں آئی تو اس نے دہائیوں پہلے اس کا علاج اپنے معاشرے کو سیکس فری کر کے نکالا ۔ تاکہ مرد و عورت  جو دن کےکئی گھنٹے اس سوچ وبچار میں گنوا دیتا ہے کہ میں نے یہ جسم کیسے حاصل کرنا ہے اس کے لیئے جسم اتنا ارذاں کر دو کہ وہ اسے حاصل کرنے کی فکر سے ہی آزاد ہو جائے ۔ اب یہ ایک اور بحث ہے کہ اس کے مالی فوائد و ترقی تو ہو گئی لیکن انہیں اس کی معاشرتی کیا کیا قیمت ادا کرنی پڑی ۔۔ ۔۔۔۔۔ جبکہ ہمارا مسئلہ یہ ہے کہ ہم  نے خواتین کو دو گروہوں میں بانٹ دیا ہے ایک وہ جو گھر میں بیٹھی ہوئی خاتون خانہ سے تو یہ توقع کرتے ہیں کہ وہ، خوب پڑھی لکھی ہو ، سر پہ دوپٹہ رکھنے والی ایک مکمل نوکرانہ مزاج رکھتی ہو جسے یہ بات بلکل یاد نہیں ہونی چاہیئے کہ اس کی کھوپڑی کے اندر بھی ایک دماغ یا اس کے سینے میں بھی ایک دل ہے جو اچھی بری باتوں پر کوئی عزت یا بے عزتی محسوس کرتا ہےجو اپنی بھی کوئی رائے رکھتا ہے یو اس کا اپنا بھی کوئی نقطء نظر ہو سکتا ہے ۔اس کی پسند کو کسی بھی صورت اپنے مرد کی سوچ سے مختلف ہونے کا کوئی حق نہیں ہے۔  وہ ہر خوبی رکھتی ہو لیکن ہمارے آگے چوں بھی نہ کرے ، ان کے گھر کی ہر ذمہ داری کو ہماری  مرضی سے ادا کرنے والی ہوں یہ ہے ہماری ایک گھر میں رکھی عورت کے لیئے ٹیپیکل سوچ  ۔ جبکہ دوسری جانب ہم نے وہ الٹرا موڈ خواتین رکھ دیں  جو کسی بھی عمر سے تعلق رکھتی ہوں کوئی بھی ہنر ان میں ہو یا نہ ہو ہاں یہ خوبی ان میں ضرور ہونی  دوپٹے اور حجاب کی قید سے آذاد ہوں ۔ نئے نئے بے حیائی کے حربےفیشن کے نام سے آزماتی ہوں ۔ ان کے بدن کا اتار چڑھاؤ ان پر نمایاں کرتی ہوئی بےحیا لباسی سے کرتی ہوں ۔ جنہیں دیکھ کر ہمارے سستی سوچ کے حامل مردوں کو اپنی آآنکھیں سینکنے کا موقع ملتا رہے ۔  ہم ان پر اپنی کمائی لٹانا بھی پسند کریں ان کے جلوؤں کے لیئے انہیں عہدے بھی یہ سوچ کر پیش کرتے رہیں کہ وہ اس کے لائق بھی ہیں کہ نہیں ۔ ایسی خواتین کو گھر بار والا بھی نہیں ہونا چاہیئے ورنہ کہیں ہمیں اس کے عوض اپنے ہی دانتوں کی قربانی نہ دینی پڑ جائے ۔ لہذا انہیں محبوبہ کٹیگری میں ڈالا جاتا ہے ۔ یہ بھول کر کہ کل ہم اپنی اولادوں کے لیئے آنے والی تاریخ کے لیئے کیا کالک اپنے منہ پر پوت رہے ہیں ۔ وہی بات کہ کل کس نے دیکھا ہے ؟   اب اس سارے گھپلے میں یہ بات ان کے دماغ سے نکل جاتی ہے کہ باہر کی دنیا میں خواتین کا ایک تیسرا طبقہ بھی ہے جو پوری جانفشانی کیساتھ سرگرم عمل ہے ۔ اور پوری ایمانداری کیساتھ اپنی پیشہ ورانہ ذمہ داریوں اور خاص طور پر صحافت کے میدان میں مضبوطی کیساتھ موجود ہے جو نہ صرف اپنے گھروں کو عزت سے چلا رہی ہیں بلکہ کمیونٹی میں بھی باعزت مقام رکھتی ہیں ۔  جن کے کام سے نہ تو یہ بھائی صاحبان انکار کر سکتے ہیں نہ ہی انہیں نظر انداز ۔ انہیں باجی باجی بھی کہتے ہیں ۔ لیکن اس سے آگے آتے ہی ان کے تمام خوبیوں کو ٹھٹھے میں اڑا دیتے ہیں اور اپنی مردانگی کو شاید تسکین پہنچانے کی کوشش کرتے ہیں  ۔ اور کیوں کہ یہ خواتین ناجائز رویوں کو برداشت نہیں کرتیں نہ ہی مردانہ ڈیمانڈذ کو اہمیت دیتی ہیں لہذا ان کی ساری کارکردگی کو بڑی بے شرمی کیساتھ بے وقعت کرنے کی کوشش کی جاتی ہے ۔ جس پر صرف ان عقل کے اندھوں سے ہمدردی ہی کی جا سکتی ہے پاکستانیوں نے پاکستان میں تو عورت پسندی میں اپنا لوہا منوایا ہی ہے جس کا انجام ساری دنیا دیکھ رہی ہے لیکن کم از کم پاکستان سے باہر تو ایسی بے حیا مقابلہ بازی سے احتراز کریں ۔ آج جو لوگ کسی بھی ذمہ  داری پر ہیں انہیں یہ بات یاد رکھنی چاہیئے کہ کل انہیں وقت کو اپنے ان تمام اختیارات کا جواب دینا ہو گا اور آپ کی اولادوں کو بھی آپ پر فخر کرنے یا افسوس کرنے کا موقع آپ کے آج کے یہ کام دیں گے اب یہ آپ پر منحصر ہے کہ آپ انہیں پاکستان میں رہنے والوں کی طرح وراثتی بے شرمی ، بددعائیں اور گالیاں دینا چاہتے ہیں یا عزت ووقار اور فخر کا احساس ۔ کیوں کہ وقت جیسا بھی ہو اس کی اچھی بات بھی یہ ہے اور بری بات بھی یہ ہی ہے کہ یہ گزر جاتا ہے ۔ اب اسے کیسے گزارنا ہے  چند لمحوں یا سالوں کی عیاشی میں یا ہمیشہ کی بعد از مرگ کی بھی عزت اور احترم کیساتھ ۔ آنکھیں کھولیئے اور اپنے ظرف کو وسیع کیجیئے ۔ کیوں کہ آنکھیں بند کر لینے سے حقیقت نہیں بدلا کرتی ۔ لیکن ایک وقت آتا ہے کہ  آپ خود اپنی ہی نظروں میں گر جاتے ہیں ۔ تو اپنی خودی کو بھی بلند کیجیئے اور اپنی ذمہ داریوں سے بھی انصاف کیجیئے ۔
۔۔۔۔۔۔۔۔۔۔۔۔۔۔۔۔

محبت بانٹنے نکلے ۔ سراب دنیا

محبت بانٹنے نکلے

محبت بانٹنے نکلے تھے پتھر لے کے گھر لوٹے

بہت سے دشت چھانے اور ہو کے در بدر لوٹے

تمہارے شہر میں ہم نے بڑی رسوائیاں پائیں 

مگر آخر غریباں شہر اپنے شہر لوٹے

ہماری سوچ سے دل تک بڑی لمبی مسافت ہے

چلو اب دیکھتے ہیں کہ کہاں سے یہ نظر لوٹے

جہاں میں مسندیں اب بے ہنر آباد کرتے ہیں 

جبھی تو لے کے آنکھیں نم سبھی اہل ہنر لوٹے

لیئے ہم کانچ کا دل برسر بازار بیٹھے ہیں 
تھے پتھر جنکی جھولی خوش وہی تو بازیگرلوٹے

وہ جھوٹے لوگ جومل کر ہمیں کو جھوٹ کردیں گے
انہیں کو آذما کر ہم بھی اپنی راہگزر لوٹے

قرار جاں بنانے کو بہانے اور کیا کم تھے
بھلا ممتاز لے کے کون یوں زخمی جگر لوٹے
۔۔۔۔۔۔۔۔۔۔۔

سنجیدہ لوگوں کی ایک یادگار محفل

سنجیدہ لوگوں کی ایک یادگار محفل

ممتازملک۔ پیرس

22 فروری 2014 کی ایک یادگار شام مہاراجہ ریسٹورنٹ کے خوبصورت ہال میں پیرس کی معروف شاعرہ محترمہ ممتازملک صاحبہ کے دوسرے شعری مجموعے  بنام میرے دل کا قلندر بولے کی تقریب رونمائی منعقد ہوئی ۔ پروگرام کی نظامت مدر آف پی ٹی آئی ، بانی انصاف ایسوسی ایشن ، معروف کالمسٹ ، رائٹر، تجزیہ نگار محترمہ شاہ بانو میر صاحبہ نے کی ۔ پروگرام ک آغاز معروف ابھرتے ہوئے نوجوان نعت خوان بلال بٹ کی نہایت خوش الحانی سے کی گئی  تلاوت کلام پاک سے ہوا ۔  جسکے بعد بچیوں کےایک گروپ جس میں ثمینہ خواجہ ، صومیہ خواجہ ، ریشمین اختر اور تحریم اخترشامل تھیں  نے دف پہ  ممتازملک صاحبہ کی اسی کتاب میں لکھی ہوئی حمد باری تعالی پیش کی ۔ جسے تمام محفل نے بہت پسند کیا اور ساری محفل سے انہیں خوب داد ملی ۔  جس کے بعد اسی کتاب کی نعت رسول پاک  ٌٌحضور آگئے ہیں  ٌٌ کو  ممتازملک نے نہایت خوبصورتی کیساتھ پیش کر کے داد سمیٹی ۔ پروگرام کے دوران کئی شرکاء اور مہمانان خصوصی نے کتاب سے چیدہ چیدہ کلام پڑھ کر سنایا اور داد حاصل کی ۔ جبکہ خوش گلو نوجوان بلال بٹ نے نہایت پرسوز آواز میں بہترین لے میں  ممتازملک کی اگلی آنے والی کتاب کا کلام ٌٌ بابا تیری باہیںٌٌ گا کر پیش کیا ۔ اور ہر آنکھ کو نم کیا ۔   

پروگرام میں سب سے بڑا خوش گوار لمحہ اور سالگرہ کا تحفہ معروف اسلامی سکالر جناب حافظ نذیراحمدخان صاحب کی ادارہ منہاج القران کے سابقہ صدور جناب عبد الجبار بٹ صاحب ، جناب حاجی حمیداللہ صاحب اور دی جائزہ ڈاٹ کام  ، جذبہ ڈاٹ کام ، اور دیگر کئی اخباراتی  سائیڈذ کے چیف ایڈیٹر جناب اعظم چودھدری صاحب کی  آمد تھی ۔ جس نے اس دن کواور بھی یادگار بنا دیا اور اس دن کی ہر خوشی کو دوبالا کر دیا ۔  ممتاز ملک کے کمسن بیٹے محمد مفسراختر  اور ان کے دوست محمد منان نے  حافظ نذیر احمد خان صاحبکو پھولوں کے گلدستے پیش کیئے ۔  حافظ نذیراحمد خان صاحب نے ان کے سروں پر دست شفقت رکھا اور دعا دی اور  بڑے ہی خوبصورت الفاظ میں ممتاز ملک کی اس کاوش کو سراہا کہ اس کتاب کہ سرورق نے مجھے کتاب کھولنے پر مجبور کیا اور میں نے جہاں تک پڑھا مجھے روحانی خوشی محسوس ہوئی ۔  کتاب کی رونمائیحافظ نذیراحمد خان صاحب نےاپنے دست برکت سے فرمائی۔ اور ان کی دونوں تصنیفات  '' مدت ہوئی عورت ہوئے '' اور دوسرے مجموعہ کلام  ''میرے دل کا قلندر بولے '' پر اپنے دعائیہ کلمات اور دستخط عطا فرمائے اور انکی کامیابیوں اور درازءی عمر کے لیئے دعائے خیر فرمائی ۔

پروگرام
 میں ایک اور سرپرائز ممتاز ملک کی سالگرہ کے کیک کی صورت لایا گیا ۔   جس پر تمام شرکاء نے انہیں سالگرہ کے موقع پر دعاؤں اور مبارکباد سے نوازہ ۔ ممتاز ملک صاحبہ نے تمام شرکاء کا شکریہ ادا کیا ۔ جنہوں نے آج کے دن کو ان کی زندگی کا ایک یادگار دن بنا دیا  
                                       پروگرام میں صرف  محدود اور مخصوص تعداد میں  ادب سے دلچسپی رکھنے والوں کو شرکت کی دعوت دی گئی  ۔ یہ تقریب اسلامی ماحول میں منعقد کی گئی جس میں کوئی مخلوط ٹھٹھہ مذاق ، کوئی نظر باز مناظر ، غیر اخلاقی گپ شپ نہیں تھی جس کی وجہ سے اسے رنگین میڈیا باذوں کا کوئی تعاون نہیں ملا ۔ یہاں کوئی پلو گرانے اور اٹھانے والے ناشائستہ نظارے نہیں تھے لہذا ایسی کسی بھی شمع کا کوئی پروانہ بھی نہیں تھا ۔ مزے کی بات  یہ رہی کہ گھر میں بیوی کو تالے میں بٹھانے والے ہی ایسی شمعوں کے سب سے پھرتیلے پروانے ہوتے ہیں جو اسلامی ماحول کا نام سن کر ایسے غائب ہوئے جیسے گدھے کے سر سے سینگ ھھھھھھھھھ۔                                                                  

 اور تو اور مذہبی ماحول اور رنگ کا ڈھنڈوڑا پیٹنے والے بھی اور پردے کا رونا رونے والے بھی منہ چھپا کر غائب رہے ۔ جب کہ یہ مذہب کے ٹھیکیدار رات کے 3 ، 3 بجے تک محفل موسیقی کا لطف لینے کے لیئے سب سے اگلی رو میں بیٹھے ہوتے ہیں ۔ لیکن خوشی کی بات یہ تھی کہ جیسا کہ چاہا گیا کہ یہاں وہ ہی لوگ  آئیں جو ادب اور تہذیب کا مطلب جانتے ہیں  تو بے شک ایسے ہی خواتین و حضرات نے اس محفل کو رونق بخشی ۔ جن لوگوں کی دُم پر ممتاز ملک کبھی نہ کبھی سچ کا پاؤں رکھ چکی تھی ان کے یہاں آنے کا کوئی سوال ہی پیدا نہیں ہوتا تھا ۔                مہمانان خصوصی میں پیپلز پارٹی کی وویمن ونگ کی صدرحق باہوٹرسٹ کی نمائندہ خاص محترمہ روحی بانو صاحبہ نےاس موقع پر اپنے خیالات کااظہار کرتے ہوئے فرمایا کہ لکھنے والوں کو معاشرتی مسائل پر کھل کر لکھنا چاہیئے ۔ اور ان مسائل کا حل بھی پیش کرنا چاہیئے کیوں کہ یہ اصل جہاد بھی ہے اورصدقئہ جاریہ بھی ۔ ہمیں ایک دوسرے کو نہ صرف آگے بڑھنے کا موقع دینا چاہیئے بلکہ ان کے کام کو بھی کھلے دل کے ساتھ قبول کرنے کا حوصلہ دکھانا  چاہیئے ۔ ایک دوسرے کی عزت کو بھی ملحوظ خاطر رکھنا چاہیئے ۔ گھروں سے صدرمحفل بننے کی گارنٹی لیکر نکلنے کی شرمناک روایت کو اب ختم ہونا چاہیئے ۔ ہمارے قول و فعل کے تضاد نے ہی ہمیں دنیا بھی ذلیل و رسوا کر دیا ہے ۔ انہوں نے کہا کہ ممتازملک  کی شاعری اندھیرے  میں روشنی کی مانند ہے ۔ جو راستوں کا تعین ہی نہیں کرتی بلکہ منزل کی نشاندہی بھی کرتی ہے ۔ جو زندگی کو عشق ومحبت ۔ اور ہوس گیری کے سوا بھی کچھ سمجھتی ہے ۔ جو ہمیں رشتوں کے تقدس اور احترام کے خاتمے کے لیئے بھی خبردار کرتی ہے ۔                                                

خواتین کی فرانس میں ایسوسی ایشن لے فم دو موند کی بانی و صدر محترمہ شمیم خان صاحبہ نے بھرپور انداز مین ممتاز ملک کو خراج تحسین پیش کیا ۔ اور ان کی اس دوسری تصنیف کو بھی صوفی رنگ  کا ایک خوبصورت اضافہ قرار دیا ۔ اور اس بات پر ذور دیا کہ سنجیدہ کام کو آگے لیکر چلنا وقت کی اہم ضرورت ہے ۔ جو ہمارے بعد ہماری اگلی نسلوں کو اپنی معاشرت اور تہذیب سے جوڑ کر رکھ سکے ۔ اب بھی اس کام میں دیر کی گئی تو کہیں بہت دیر ہی نہ ہو جائے ۔ اردو ہمارے ملک کی اور ہماری پہچان ہے ،عزت ہے،اس پہچان کو بچانے کے لیئے غور و فکر کرنا انتہائی ضروری ہے  جو کہ افسوس' جانتے ہوئے بھی لوگ نہیں کرتے ۔ دنیا بھر میں 104 ملئین سے زائد لوگوں میں بولی والی زبان، ہم اس زبان کے وارث کہلانے والوں میں ہی لاوارث کی جارہی ہے ۔ جو کہ لمحئہ فکریہ ہے ۔  

محترمہ روبانہ مصطفائی صاحبہ نے اپنے خیالات کا اظہار کرتے ہوئے فرمایا کہ  کہ میں ممتازملک صاحبہ کو ویسے تو ابھی اتنا ذیادہ نہیں جانتی ۔ لیکن تھوڑے وقت میں جتنا بھی پڑھا ہے اس سے اس بات کا بخوبی اندازہ لگا سکتی ہوں کہ کہ ممتاز ملک ایک مضبوط سوچ اور نظریئے کے ساتھ قلم اٹھاتی ہیں جو نہ صرف ہمارے مذہب کا دائرہ پار کرنے والوں پر آواز اٹھاتی ہیں بلکہ معاشرتی برائیوں پر بھی صدائے احتجاج بلند کرتی ہیں ۔ مذہب اور معاشرے کے دائرے کو قائم رکھنے کے حسن کو خوبصورتی سے بیان کرتی ہیں ۔ جس کے لیئے وہ مبارکباد کی مستحق ہیں۔                                                                                    

محترمہ نگہت صاحبہ نے اپنے رائے مین ممتاز ملک سے اپنی پہلی ملاقات اور 6 سال بعد کی جان پہچان کو نہایت خوشگوار سفرقرار دیا ۔ جس میں ہم نے کئی بار اپنے وطن اور معاشرےکی تنزلی کا رونا  ہے اور ایکدوسرے کے غم میں دل کا بوجھ بھی بانٹا ۔ انہوں نے کہا کہ ان کی تحریر ممتازملک کی عملی زندگی پر بھی لاگو ہوتی ہے ۔  یہ بات وہی جان سکتے ہیں جوان کے ساتھ کچھ وقت گزار چکے ہیں ۔  بظاہر بے فکر اور بے غم نظر آنے والی ممتاز حقیقت میں اپنی تحریروں کی ہی عملی تفسیر ہیں ۔ جو اپنی معاشرتی اور مذہبی حدود کی بے حد عزت کرتی ہیں ۔ جو مردوں اور عورتوں کو ایک دوسرے کا مددگار تو سمجھتی ہیں لیکن انہیں دین کی حدود کا مذاق اڑانے کی اجازت دینے کو بلکل تیار نہیں ہے۔ اور شاید یہ ہی ان کا جرم بھی ہے ۔ مادر پدر آذادی کے متوالوں کے لیئےممتاز ملک کے الفاظ نشتر کا کام کرتے ہیں ۔ اس لیئے ان کے پڑھنے والے بھی سنجیدہ اور متین لوگ ہی ہیں ۔  

مدر آف پی ٹی آئی ، بانی انصاف ایسوسی ایشن ، معروف کالمسٹ ، رائٹر، تجزیہ نگار محترمہ شاہ بانو میر صاحبہ نے جو کہ پروگرام کی نقابت بھی فرما رہی تھیں ، نے ممتاز ملک کو ایک حقیقت پسند
 کالمسٹ اور شاعرہ قرار دیا ۔ انہوں نے کہا کہ کیونکہ ممتازملک کی شاعری میں سستے  بازاری اندازاور گھٹیا جذبات کی ہوس نگاری نہیں ہے جو ادائیں مردوں کو لُبھا کر اپنے جال میں پھانسنے کو کامیابی نہیں سمجھتی ، تو اس کو قبول کرنا بھی ہمارے منافق معاشرے میں آسان نہیں ہے ۔ عشو'ی طرازی کے بازار میں ممتاز اپنا کانچ کا دل لیئے پتھروں کی بارش میں کھڑی ہے ۔ ہر سچ لکھنے والے کی طرح جو ہاتھ مین قلم تھامے برائیاں قلم کرنے نکلتا ہے ۔ ضد باز اقرباء پروروں ،اناپرستوں نظر بازوں اور منافقوں کے سامنے ممتاز ملک کا نام ایک گلے کی ہڈی اور ایک چٹان  کی طرح ہے ۔ایک ایسی چٹان ہستی  جو ہمت اور جراءت کے ساتھ عملا خود کو دین اور معاشرت کیساتھ وابستہ رکھنا جانتی ہے ۔ جوہر تکلیف اور نقصان میں خدا کی حکمت تلاش کرتی ہے ۔ اور بہتری کی امید بھی رکھتی ہے ۔ جو کبھی اور کسی بھی حالت میں مایوس نہیں ہوتی ۔ جو خدا کے خوف سے زیادہ اسکی محبت پر یقین رکھتی ہے ۔ جو روز حساب کو بے لگام جوانیوں اور شرمناک بڑھاپے کے لیئے ایک نقارہ سمجھتی ہے ۔معاشرے میں بڑحتے ہوئے بے راہروی کے رجحان کولگام دینے کی ضرورت ہے جس کی وجہ سے کام سے کام رکھنے والی  خواتین جب ان مخصوص ذہنوں کے آگے چلنے سے انکار کر دیں تو انکی کردار کشی اور انہیں بدنام کرنے کے لیئے ان پر کیچڑ اچھال کر تہمت لگا کر انہیں انتقام کا نشانہ بنانے کی بھرپور کوشش کی جاتی ہے اور جن کو خوشن نصیبی سے اپنے معتبر دوستوں اور خاندان کا ساتھ میسر آ جائے تو انہیں پیغام بھیجا جاتا ہے کہ ''حیرت ہے وہ ابھی تک ذندہ ہیں اور لکھتی بھی ہیں '' تو ایسے تمام خدا بننے کی کوشش میں مصروف خواتین و حضرات لیئے ممتازملک ایک بہت بڑا چیلنچ بن گئ ہے کیونکہ ان کا مقابلہ کام سے کرنے کی ان میں سے کسی میں بھی  صلاحیت ہی نہیں ہے لہذا انہوں نے ممتاز ملک کو سازشوں کے ذریعے توڑنے کی گھٹیا  کوشش شروع کر دی ۔ ممتازملک نے صرف شاعری ہی کے ذریعے نہیں بلکہ اپنے کالمز کے ذریعے بھی غضب کی جراءت کا مظاہرہ کیا ہے ۔جو مردوں کے مسائل کو مرد بن کر بیان کرتی ہے تو عورت کا درد عورت بن کر سمجھتی ہے تو بوڑھوں کے غم بوڑھا بن کر محسوس کرتی ہے اور کھل کر بیان کرتی ہے ۔ ممتازملک کی تحریر کسی خاص عمر یا جنس کے لیئے مخصوص نہیں ہے اسکا لہجہ حقیقت کی دھار لیئے ہوئے ہے ۔ جو یقین کی طاقت سے پُر ہے اور باتوں میں اثر تبھی پیدا ہوتا ہے جب آدمی قول اور فعل کے تضاد سے پاک ہو ۔ کیوں کہ یہ سب وہ لوگوں کی جیبیں خالی کرانے ، بیرون ملک دورے کی ٹکٹس بٹورنے،  پاکستان کی مفت سیروں کے لیئے نہیں بلکہ صرف اور صرف اللہ کی رضا اور صدقئہ جاریہ سمجھ کر کرتی ہے ۔ آخر میں ممتاز ملک نے اپنے مہمانوں کو اس بات کا یقین دلایا کہ سچائی کی یہ مشعل جو انہوں نے ہاتھ مین اٹھائی ہے یہ تاعمر تھامے رہوں گی ۔ حضرت علی کرم اللہ وجہ کے بقول  جو ہر ایک سے متفق ہوتا ہے وہ سب سے بڑا منافق ہوتا ہے ۔ اور ایک اور جگہ حضرت علی کرم اللہ وجہ فرماتے ہیں کہ سچے کو ایک ہی غم ہوتا ہے کہ وہ تنہا رہ جاتا ہے ۔  میں تاحیات  باب العلم حضرت علی  کرم اللہ وجہ کے اقوال سے روشنی لیتی رہی ہوں اور لیتی رہوں گی ۔ میں اللہ کی شکر گزار ہوں کہ میں اس سفر میں تنہا نہیں ہوں بلکہ آپ جیسی حق پسند ہستیاں اور میرے قارئین کی محبتیں مجھے حوصلہ دیئے ہوئے ہیں میں ان تمام احباب کا بھی شکریہ ادا کرتی ہوں جنہوں نے  دنیا بھر سے اس سالگرہ اور میرے دل کا قلندر بولے کے لیئے مجھے مبارکباد کے پیغامات فیس بک سے، فون سے مسینجرز کے ذریعے بھجوائے ۔ ایسے ہی بہن بھائی اللہ کی جانب سے میرے لیئے تحفہ بھی ہیں اور طاقت بھی ۔ لہذا وہ سب جہاں بھی خوش رہیں ، سلامت رہیں ۔ آمین 

خاص طور پراپنی پیاری ساتھی اور بہن صفیہ خواجہ صاحبہ کا دل و جان سے شکریہ ادا کرتی ہوں جنہوں نے ہر قدم پر میرا ساتھ دیا ۔جزاک اللہ 

۔ ایک بار پھر سے تمام مہمانان گرامی کا بے حد شکریہ 

۔۔۔۔۔۔۔۔۔۔۔۔۔۔۔۔۔۔۔۔۔ 

لائیو انٹرویو ۔ شاعرہ ممتاز ملک

31 جنوری2014 بروز جمعتہ المبارک

یورپ ٹائم ۔ دوپہر 3 بجے 

پاکستان ٹائم ۔ شام 7 بجے

۔۔۔۔۔۔۔۔۔۔۔۔۔۔

● ٹائٹل / میرے دل کا قلندر بولے

ٹائیٹل کتاب

معروف  شاعرہ ممتازملک

 کے

 دوسرے شعری مجموعے کا ٹائٹل 

بنام ٌٌ میرے دل کا قلندر بولےٌٌْ کی

تقریب رونمائی ۔ 22 فروری 2014 بروز ہفتہ

بمقام ۔ مہاراجہ ریسٹورنٹ اوبرولیئے

پیرس ۔ فرانس

●●●

● دعوت نامہ رونمائی/ میرے دل کا قلندر بولے

دعوت نامہ برائے 

رونمائی پروگرام 

میرے دل کا قلندر بولے 2014ء 

بسم اللہ الرحمن الرحیم

اتنا دیا سرکار نے مجھ کو جتنی میری اوقات نہیں 

یہ تو کرم ہے آپکا ورنہ مجھ میں تو ایسی بات نہیں 

خوش آمدید ،

تقریب رونمائی 

معروف شاعرہ ممتاز ملک صاحبہ کا دوسرا شعری مجموعہ

ٌ میرے دل کا قلندر بولے ٌٌ ٹائٹل ٌ

ہم نہایت خوشی کیساتھ آپ کی خدمت میں پیش کرتے ہیں 

،02،2014 22 بروز ہفتہ دوپہر 2 بجے سے 6 بجے تک

پیرس فرانس 

یہ دل ہے عبادت گاہ صنم 

اس دل کو تُو بازار نہ کر 

جو خلقت میں رُسوا کر دے

تُو مجھ سے ایسا پیار نہ کر

شکریہ

،،،،،،،،،،،،،،،،

مہاراجہ ریسٹورنٹ ۔ سانتغ کمرشیال ۔ میلیونیغ ۔ اوبیرویلیئے 

انٹری ۔ 10 یورو پر پرسن 

،،،،،،،،،،،،،،،،،،،

19 rue Madeleine Vionnet (ex rue de la Gare), Aubervillers 93300

Autoroute : A1, périphérique Est puis porte d'Aubervilliers

Métro : Ligne 12, Porte de la Chapelle 

Métro : Ligne 7, Corentin Cariou

Bus : 35, 239

●●●

پہلا شعری مجموعہ

   

                     شاعرہ ممتازملک کا پہلا شعری مجموعہ

                     بنام ۔ مدٌْت ہوئی عورت ہوئے ٓٓ

                     تاریخ رونمائی ۔ 20 نومبر 2011 بروز ہفتہ

                     بمقام رائل شاہجہاں ریسٹورنٹ پیرس

                     مہمان خصوصی شاہ بانو میر صاحبہ

                       ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 

● (72) آنکھیں بیچیں / شاعری ۔ سراب دنیا

             آنکھیں بیچیں 
            (کلام/ممتازملک۔پیرس)

میں نے اپنی آنکھیں بیچیں 

مجھ کو خوابوں میں رہنا تھا 

میں نے اپنے سپنے بیچے 

مجھ کو سپنا سچ کرنا تھا 

پھر میں نے سچ کو بھی بیچا

سچ سے مجھ کو کیا ملنا تھا 

سچ کو بیچا جھوٹ خریدا

جھوٹ کی منزل سرکرنا تھا

جھوٹ کی بنیادوں میں مجھ کو

سچائی کا خوں بھرنا تھا  

اب تک نہ ممتاز یہ سمجھے 
ہم کو آخر کیا کرنا تھا

●●●

● (18) وہ اک جواں/کالم۔سچ تو یہ ہے

(18) وہ  اک جواں
ممتاز ملک ۔ پیرس

وہ  اک جواں جسے کہتے تھے اعتزاز احسن

حیات و موت کی کیسی ہے ساز باز احسن

 روز ہی ایک جیسی خبریں پڑھتے دل جیسے اوبھ سا گیا ہے کوئی دن نہیں جاتا جب جسموں کو لاشوں میں بدلتے دیکھے بنا سورج پاکستان میں ڈھلتا ہو  ، لیکن اس دن کچھ عجیب ہوا بہت حیران کر دینے والا ، رونگٹے کھڑے کر دینے والا کچھ ہماری نظروں کو شرم سے جھکا دینے والا ۔ لیکن ہم میں تو شرم نام کی کوئی شے ہے ہی نہیں کبھی کسی شاعر نے کیا خوب کہا تھا    کہ 

  پہلے آتی تھی ہر اک بات پہ شرم 

 اب کسی بات پر نہیں آتی 

لیکن اس عالم بے شرمی  میں بھی ایک ابھرتی ہوئی جوانی لیئے معصوم سا جوان کہ جس کی مسیں بھی ابھی نہ بھیگی ہوں ہمیں ہمشہ کے لیئے اپنے ہونے کا احساس دلا گیا ۔  حسب معمول اپنی ماں کا ہاتھ بٹا کے اپنے سکول جانے والا یہ بچہ  ابھی سکول پہنچ ہی رہا تھا کہ اسے ایک دوسرا لڑکا کچھ مشکوک انداز میں سکول کی اسمبلی میں جاتا ہوا دکھائی دیا ۔ بم دھماکوں کا تو دور ہے ہی تو ہر آدمی کا پہلا شک یہ ہو تا ہے کہ کہیں یہ کوئی دہشت گرد تو نہیں ، تقریبا ایک ہزار کے قریب بچے جو اسمبلی کے لیئے سکول گراؤنڈ میں موجود تھے ان کی جان کو خطرے میں دیکھتے ہوئے اس نوجوان نے اپنی جان کی پرواہ نہ کرتے ہوئے اسے دبوچ لیا اور اسمبلی کی جانب بڑھنے سے روک دیا اسی کشمکش میں خود کش جہنمی بمبار کے ساتہ بندھا ہوا بم ایک دھماکے سے پھٹا اور بمبار کو تو واصل جہنم کر گیا لیکن جنت کے ایک شہزادے کو بھی بہادری کی ایک لازوال تاریخ کا حصہ بنا گیا ۔ 

 سچ کہتے ہیں 

 اے پتر ہٹاں تے نئیں وکدے تُوں لبدی پھریں بازار کڑے 

اے دین اے میرے داتا دی نہ ایویں ٹکراں مار کڑے

یہ بھی ایک دھماکہ تھا ہر روز جیسا ہی دھماکہ لیکن یہ ایک نئی سوچ کا دھماکہ بھی تھا جس نے ہم سب کو جھنجھوڑ کر خواب غفلت سے جگانے کی کوشش بھی کی اور اس بے خبر قوم کو یہ احساس دلایا کہ ان تیرہ سالوں میں ہر روز جو بچے پیدا ہو رہے ہیں، جو بچے تھے جوان ہو رہے ہیں اس کی سوچوں کے دھارے اب اپنا قبلہ تبدیل کر رہے ہیں انہیں اس بات کا احساس شدت سے ہونے لگا ہے کہ ہمارے بڑے ہمیں اس خوفناک عذاب میں مبتلا تو کر سکتے تھے لیکن اس عذاب سے نکالنے میں دو سو فیصد تک ناکام ہو چکے ہیں اب ہمیں ان کھوکھلے بزرگوں اور کھوکھلے ستونوں کی جانب دیکھنے کے بجائے اپنی اور اپنی آنے والی نسلوں کو بچانے کے لیئے خود ہی عملی قدم بڑھانا ہوں گے ۔ ہم میں سے ہر ایک کو ایک ہزار کو بچانے کے لیئے کسی ایک کو ہر صورت اس موت سے لپٹنا ہوگا اور ان موت کے دوزخی سوداگروں  کو انہیں کے انداز میں شکست دینا ہو گی ۔ لیکن سوال اپنی جگہ قائم ہے کہ حکام اس بات کا جواب دیں کہ یہ سب ہو گا تو آخر کب تک ؟ اور کتنے اعتزاز اس قربان گاہ شوق میں بھینٹ کیئے جائیں گے ؟ آخر کتنے ؟

●●●

تحریر: ممتازملک.پیرس 

مجموعہ مضامین: سچ تو یہ ہے

اشاعت:2016ء

●●●